Church Foundation

Houbung Bul

Houbung din datna chu Christa itahsan nao chunga ki ngam ahi. Hiche TAHSAN chu insung khat cheha Pate hon atuhdetuva, Nute hon adinpiuva, chule Chate hon ajui diu ahi. Hiche hi Christian Insung khat umdol ahi.

Mi loi khat in Houbung hi mipi tam jo thu thu a ki vai po din asei juve. Hiche hi mun chom gamchoma Democracy umdol ahi, houbung sunga man ding apha pon ahi. Ajeh chu houbung sung hi mipi dei (Democracy) bang hilouva Pathen deibanga (Theocracy) ki kal song ding ahi.

Kho le vengsunga Houbung khat adin datna ding chu Christa Tahsan dih ta leh det tah (Christian upa mai mai hi lou) nei ho chunga ki ngam ahi. Hiche Christa Tahsan det tah nei upa ho chun Christian te ho Pathen houkhom, taokhomna, kitil khouna leh kipan hu na ho chu alam kai diu ahi.

Kum tam man hi lou, chih le thepman hi lou, hao leh vai man chunga Upa lamkai pan sah lou ding ahi. Christa atahsanna ichan a deta, Bible thuhil ichan a juiya, in sung, kho sung leh vengsunga mite ho vetsui theiya ichan a um em ti hi khol angai je.

Upa kiloikhom ho chu Pathen in apeh dola, ahetnao chunga pon tho taha pang khom diu ahi. Lamkaiya pang ding jong aum in, mitil khou va pang ding jong um ing tin, Bible thuhil a pang ding jong um in te. Ama ho chun natoh alen aneova khen louva, ama ho talent chen kihet dung yuiya kitah tah a atoh cheh diu ahi.

A tahsan Upa ho kitah na, pot thon a, pon pan na, leh pan lah na ho chunga aji acha teu leh kho sung veng sung mite hon hiche kiloikhomna houbung chu ahin tahsan uva, pan ahin lah diu ahi. Upa kitah lou jeha tahsan chate kiloikhomna cheh chao tam pi aum e.

Akhum kha na a sei din, khosung veng sunga houbung aum doh theina ding leh adindet na dia Christa Tahsan dihtah Upa ho chung a aki ngam e. Mipi tam jo thu thua houbung ding det ding ahi poi. Bible Thuhil sim jing a, tuhchah a, juia kona houbung kivai po dong ahi. Houbung sung kivaipohna hi mipi tam jo dei dei (democracy) hi louva, Pathen deina (Theocracy) chunga kingap joh ding ahi. Chubana hiche kiloikhomna houbung sunga um Upa cheng hon ama ho talen chen dung juiya kin aki lah them diu ahi. Chu teng leh hiche Tahsan jala kitung doh houbung chu ding det ding ahi.