Thumakai
Myanmar gamsunga i-jat i-nam khan khou hi, gil taha gel phat ahi tai. A chesa kum 30 val laiya pata i-jat min u thua i-hung ki boi peh u ahin, hiche hin i-jat i-nam diuva khantouna asu tang den in, tu ni chan in i-ma tong khom thei lou vin, i-ki nom den un ahi. Mailam a apha di aka gel khat thun anoiya houlimna ka hin nei je.
Min dei dan chom chom
Min thua dei dan chom chom aum in ahi. Thadou dei loi aum in, Tado joh dei lou aum in, Khongsai dei loi aum in, Kuki dei loi aum in, Kuki Chin dei loi aum in, Thadou Kuki dei loi aum in, chule Thadou Kuki Chin dei loi aum e. Min jat 7 jen dei dan ahung um doh tan ahi.
Hiche min chom chom ho hi khata gop khom ding dei nan avel vel in, amun amun a kimutona ana ki bol e. ZBC lam kai na ahin, Chin State Council lamkai na ahin, chule kimutona le kihoulimna chom chom ana um in, ahin tu ni chan in min khat a um thei na chan aki pha jou nai pon ahi.
Gamkai chom min dei dan chom
Homalin lhanga masang chun Khongsai tin ana ki hen, tun abon in Kuki or Kuki Chin tin aki min vo un ahi. Hiche Kuki Chin min hin houbung kiloikhomna aum in, chule Kuki min in jat le nam kiloikhomna aum in, hiche min hin Chavang Kut jong kum seh in abol un ahi.
Chin State sahlam Tonzang Township sunga cheng i-jat i-nam ho hi, i-chen khompi jat dang hon Thadou tin ei na min vo un, tu ni chan in hiche min hin ei he den uve. Hiche i-chennao lhang hi Thangkai Lhang tin aki min vo e.
Thangkai lhang sunga cheng i-jat chan khom pi ho sunga Thadou min dei jong aum in, Tado min joh dei jong aum in, chule Kuki min dei jong aum e.
Achesa kum 50 vel chun Chin State sunga Tonzang Township kon, sah lam Homalin gam kai a kon leh Manipur State akon in Kabaw Valley sunga i-hung cheng lut un, hiche gam kai sunga hung cheng khom, kim khat ho chun Thadou leh Kuki min ni gop theinan Thadou Kuki hi leh tin adei sah un ahi. Ahin tun Kabaw Valley sunga Thadou achom chule Thadou Kuki achom tin aum e.
Jat le nam min dei dan akibah thei lou jeh in, i-lung gel u jong aki bang thei ji pon, khat le khat, chule in sung khat ngel sunga jong tohkhom thei na alhom tan ahi. Hiche hi i-jat le in-nam pum pi diuva i-gal len pen u ahi. A thoi dam je i-het lou u leh tu din mun sanga khoh joa i-gal uva hung pang ding ahi.
Thukhumkhana
Tun din mun a kimu dan chu ahi leh Thadou jong hi adei mipi phachom pi aum in, Kuki dei jong phachompi aum in, Thaodu Kuki dei jong pha chom pi aum e.
Achesa, tudin mun leh mailam din mun ding aki gel leh apha dinga ki mu khat chu, i-nam min u KHAT a so doh ahahsan, agam kai dung jui jin kiloi khomna pha tah in kisem doh cheh hen lang, gamkai sunga chun jat le nam a dinga pha chom ho mun a pan lau hiu tin, na tong thei leu hen pha pen ding ahi.
KHAT a din ding i-gon u leh kum 30 vel i-kiboi khah kit mai diu ahi. Hisang chun i-min dei cheh un natoh pan u tin, jat le nam phat chom na ding gong pan ta leu hen pha pen ding in aum tan ahi.
Dr Neh Kho Lal
February 26, 2013: Yangon, Myanmar
Leave a Reply