Polycarp Hinkho Thusim

Polycarp Hinkho Thusim (AD 69-155)

Polycarp hi Turkey gam Smyrna kho a AD kum 69 chun ana peng in, AD 155 chun meiyin hal lih in ana um e.
Polycarp hi Smyrna kho a, kum tampi bishop in ana pang e. A khandon laiya pat in solchah John henga ana um jing in, chule kum zabi 2 laiya Christian lamkai min thang tah khat Irenaeus toh jong ana ki vop e.

Bishop ana pantil a pat chun Ignatius a kon in seiphatna lekha ana mun ahi. Khonung in amatah in, Philippi houbung mite ho henga tilkhouna lekha ana thot e.

Christa nung jui kitah tah ahi jal in, tha din mat in ana um e. A kitha na mun a aki kai masang in, a toh khompi ho khat cheh ding leh houbung machalna din pung (2) sung atao jom e.

Roman lamkai (governor) in, Polycarp henga achung thu ki lha-ong theina ding in “Christa nel din” ana jol e. Polycarp in Roman lamkai pa ale donbutna a: “Kum (86) chan jen, A-lhachan ka hung pang in, Aman kachunga ima thilse abol kha poi. Ken ei huhhinga, ka lengpa chu iti ka nel ding ham?” tin asei je.

Athat dia lamkai pan “Ven, sa hang ho tampi aume; na tahsan na khel louva nahi leh, hiche sa-hang ho laha ka le lut ding na hi,” tin agih sal e. Polycarp in, “Bol jeng in. Thil dih lou lam a, kikhel chu keidia thil pha lou tah ahi. Thilse lam lhen sanga chonphatna lam lhen chu manlu jo ahi” tin ale don but e.

Athat ding pa chun avel in, “Na lung khel in, na lung na khel lou leh sa hang tha lihsah khel’a, mei kong laha ka le lut ding na hi” tin agih kit e.

Polycarp in “Phat chomkah khat sunga eika vam thei meiya hal dia nei gih ahin, nang tabang Pathen gin lou, nang joh chu tonsot a dia nachunga meiya thutanna lhung ding ahi. Nei hal jeng in. Sa hang nei tha sah nom em? Ahi lou leh meiya nei hal nom em? Hung in, na lo nom nom nei lon jeng in” tin achou jo ahi.

Achai nan, Polycarp chu mei kong in ahal lih un, houbung mite hon agu hal ho chu achom khom un, avui un ahi. Polycarp nung jui houbung mite ho chu Smyrna a kon in Gaul lama aki theh cheh un, akim khat ho chu AD 177 vel chun kichepna (circus) muna ana that uve.

Hiche ho laha chun sohnumei khat, amin Blandina kiti nu jong ana that uve. Ama nu hi aman un, a eng bol un, “Christa nel in” atiuve. Ama nun “Kei ma Christian khat ka hi. Kei hon thilse ima ka bol pouve” tin ale sei jin, chujou vin ama nu chu bomsunga akhum un, bong hang tah kul sunga a leh lut un ahi.

Polycarp leh anung jui hon jong, ahinkhouva a ahintahsan peh’u Christa chu ahinkho phal ngam in ana din pi un ahi. Tui lai Christian te hon Christa itahsan nao chu ichan geiya idin pi diu ham? Lhep patep leh gihna ahung um teng ijam san jeng diu ham? Polycarp hinkhoa kona adeh a Christian te hon tha ilah cheh diu vin ikitil khou nom un ahi.

Polycarp hi ateh nung, AD kum 155 (166/177) vel chun atahsan na jal in tha in ana um e. Polycarp kitha na thusim hi “The Letter of the Smyrneans on the Martyrdom of Polycarp” kiti sunga aki mu thei je.

Sources:
1. https://www.google.com/search?q=Polycarp&oq=Polycarp&aqs=chrome..69i57.2171j0j8&sourceid=chrome&espv=210&es_sm=122&ie=UTF-8
2. Tony Lane. A Concise History of Christian Thought. (Rapids, Michigan: Baker Academic, 2006). p. 9.
3. D. Jeffrey Bingham. Pocket History of the Church. Downers Grove: IL: InterVarsity Press, 2002), 29-30.
4. Stephen Tomkins. A Short History of Christianity. Grand Rapids, Michagan: William B. Eerdmans Publishing Company, 2005), P. 27.