Pathen Mi-ngailutna

Rev Lun Kho Thang

20140325_090718Bible themsang ho mudan in, ngailutna hi jat 3 leh 4 in aseiyun, hiche lah’a chu Agape ngailut na kiti hi ngailutna chung nung pen ahin, hiche Agape ngailut na’a chu Pathen in mihem te angailut ahi. Hijeh a chu Patehn chu “Ngailut” ahi kiti ahi (1 John 4:8).

Pathen in mi chonse ho angailut dan vetsah na hi OT 2 Sam. 9:1-13 sunga David lengpa leh Mephiboseth thusim’a konna muthei ahi. Pathen thupeh anit lou jeh’a leng Saul leh achilhah jouse David in atagam dia Pathen thupeh um jongleh leng David in agol pha tah Jonathan jal’a achapa Mephiboseth angailutna thu aki mui (2 Sam. 9:1). Hiche thu ahin vetsahna thum in veo hi te.

Leng David hi Pathen dinmun, Saul hi Satan dinmun, Jonathan hi Jesu, chuleh Mephibseth hi michonse ho toh te kah thei ahi. Leng Sau in Pathen thupeh anit lou jeh’a achilhah (michonse te) jouse Pathen lung han jeh’a thagam dia (damun lhung dia) um ahi.

Hinlah David dia alungtoh leh angailut pen Jonathan jal’a Mephiboseth ahing hoiya athada banga, Pathen in Achapa ngaitah Jesu jal’a mi chonse ho ahing hoi ahi. “Pathen in … Achapa ngaitah chang khat chu apetai (Jn 3:16)”. 2 Sam. 9:7a sunga “… kicha hih in, napa Jonathan jal’a ka khoto ding na hi” ati.

Mephiboseth (David galpan) in, achan ding lom lou, lengpa an-kong um dinga’ len/kou ahi bang’a Pathen in Jesu jal’a lom louva, Pathen anga’a um thei na, Pathen insung mi hi thei na, Pathen gam lo theina thu ineiyu ahi. “Kapu, uicha thiso tabang bep kei hi iya pang dia nei chute khoh sah ham.

2 Sam. 9:8 na, Mephiboseth in asei bang’a kei le nangin jong, “Pathen in michonse panna bei kei hi idia nei kohsah ham? iti diu ahi. Ajeh chu Mephiboseth in David in angailutna chu ahindam sunga’ alethuh jou lou ahi. David in Mephiboseth angailutna chu Pathen in michonse ho angailutna AGAPE ngailutna chu toh kibang ahi.

Mihem lunggel din Mephiboseth in David lengpa an-kong’a lung mong tah’a anneh twidon anei ding hi tahsan lelna um thei ahi. Hinlah David lengpan agape nagailutna dihtah’a angailut ahet cheh tah tah phat in lung mong tah leh kipa tah’a lengpa an-kong aum bang’a Pathen mingailut na theng tah’a hichen ho din Pathen insung mia kisima Ama toh chenkhom, umkhom ding chu ki jachatna sang’a lung monna leh chamna mun joh hi ding ahi.

Mephiboseth hi leng David dia chapalam thu ahi bang’a ei ho jong chapa lam thu ihiuvin, hijong leh Mephiboseth bang’a Pathen in chapa tah beh’a ei sau-va, Christa Jesu jal’a tonsotna Pa toh gou i-lo khom diu ahi. Halleluijah!
Pathen in asim jouse phatthei eiboh tau hen.

2 Sam. 9:1-13; Jn 3:16; 1 Jn 3:1

March 23, 2014

3 comments to Pathen Mi-ngailutna

  • Hiche Sermon chun ka kipah lheh e

    Kipa umtah thu giltah hohi kipanan kasang jinge

  • Mang

    Pu amasan kaja na salam kahin bol e tulai
    Mihon som a peh hi kani kanja no4 ti hoa
    elamdoh ho jong phatah a epeh le akhoh poi
    Pathen sem mama ahi atiuvin abang in thilphalou
    ahin peh lou ding ahi tiloi aum in kicheh tah
    in bol ding le bol louding ahi dan kahet nom in
    lungset tah in nei hin hilchet peh theidem

Leave a Reply to Mang Cancel reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>