Hebrew Mite Henga Lekha Thot

Thupatna

Hebrew mite henga lekha thot hi-Christian phabep akidoupiu pung cheh cheh a, Christian tahsan lama alhah dah diu gin jal’a kisun ahi. Alekha sun pan Christian hahsatna toh ho hi- Jesu Chrita ijakai kikhon na Pathen mihemte henga akiphon chaina ahidol seiya atahsan’uva ding det dia atilkhou ahi. Hiche aseinaa hin thupi cheh thum aseiye:

(1) Jesu hi tonsot Pathen Chapa ahin, dihtah a thu nunje Pathen a kihil them, hahsatna thoh chaisoh ahidol aseiye. Chule Jesu hi Pathen chapa ahijeh-in Kitepna Lui themgao jouse sanga lenjo, Vantilte sanga chungnung, Mose sanga lenjo ahina aseiye.

(2) Pathenin Jesu hi tonsot thempu ahina le Kitepna Lui Thempu ho sanga athupina aseiye.

(3) Jesu tahsanjal’a atahsante chonset, kichatna chule thinaa kona huhhinga um ding aseiyin, thempulen ahijeh-in Jesun huhhingna dih chu apei, hiche hi masanga Hebrew Houva kithoina le gantha kilhaina hon aphondoh thu aseiye.

Israel thusim a mi minthang ho aseiyin (Bung11), alekha sunpan alekhasut simte kitah jinga um din a-ngeh-e, chule Bung 12 sunga akhon ni geiyia thoh lhum kei ding le, Jesu lam jeng kat jinga , itobang hahsatna hung lhung jong le bolsetna tintang thoh lhum kei din atem’e. Hilchahna le gihsalnan alekhabu hi akichaiye.

Asung Thu Hopkhen

Thupatna: Pathen thuphon lhingset Christa 1:1-3

Vantilte sanga Christa chungnungjo 1:4-2 :18

Mose le Joshua sanga Christa chungnungjo 3:1-4 :15

Christa Themput chungnung pen 4:14-7 :28

Christaa Kitepna chungnung pen 8:1-9:28

Christaa kilhaina chungnung pen 10:1-39

Akhohpen le amasapen Tahsan 11:1-12:29

Tilkhou chaina le thu chaina 13:1-25

Hebrew Bung 1

Pathenin achapan thu aseitai

1Masang laiyin a Pathenin phattamtah vei lamchom chomin ipu ipateu henga Themgao ho kamin thu anasei jin,

2ninunung phat hin Chapan eiho henga thu ahinseitan, Chapa hi ijakai goulo dinga atun ahin, ama jeh a vannoi jong asemdoh ahi.

3chapa chun Pathen loupi vah le alim tahbeh chu apodoh-in, thanei tah athu chenga thil ijakai hi atuh chah jing ahin, chonset’a kona suh thengna abol jou phat’in lal loupi chungnung pen jet lama atouvin,

4Vantilte sanga gamchenga minphajo gou alojeh-in, amaho sangin achungnungjotai.

Chapa Vantilte sanga chungnungjo

5Pathenin Vantilte koipen jah a itih a chu: "Nangma kachapa nahin, Tunia kahin nahi," ati khah em? Chujongle: "Keima apa kahi ding, Ama kachapa hiding ahi," atim?

6chukit le ijakai sanga masapeh achapa vannoi leiset’a ahinpui ding chun aseiyin: "Pathen Vantil jousen Ama chu chibei boh cheh-u hen," ati.

7Chul vantilte chung thudol’a aseiyin: "Aman a-Vantilte chu hui asosah-in, Alhachate chu meikong asosah-e," ati.

8Chapa thudol’a vang: "Vo Pathen nalaltouna chu tonsot tonsot geiya um jing ahin, Kitahna tenggol chu Nalenggam tenggol ahi.

9Nangin adih na-ngailun, Dan dih lou nahot bol’e; Hijeh a chu Pathen, na-Pathenin thao nanua, Naloite jouse sanga nachoi sanga olive thao nanu ahi," atibouve.

10Chule: Vo Pakai, nangman semtil’in Leiset bulpi naphutdoh-in, Chule van ho jong hi nakhutsem ahi.

11Hiche ho hi mangthah diu ahin, Nang vang um jing ding nahi; abonchauva ponsil banga chulsoh diu ahi.

12Aboncha hi ponlhe banga najeldoh a Ponsil banga nakheldoh ding ahi. Nang vang nabang nahi jingin, Nakum jong beitih um lou ding ahi.

13Hichea hi Vantilte koipen jah a: "Keiman namelmate nakengchotpha kaneisah masangsen Kajet lam’a tou jingin," ati beh em?

14Vantilte chu abonchauva lhacha kinbol lhagao, huhhingna goulo ding ho jenle dinga hinkisol hilou hiuvem?

Hebrew Bung 2

Hibang tah a nasa huhhingna

1Hichejeh tah a hi ithujah chengseu hi lung nachang cheh a i-ngai diu, achutiloule ikimoh tolmang diu ahi.

2Ijeh-inem itile Vantilte seidoh thu bon chubanga adet’a, asu-khel ho le angailou hon kitoh chet’a talen akisan’u le,

3hitobang huhhingna nasatah hi nahsah mo leu hen iti isochat diu ham? Athu hi akipatnaa Pakai tah-in aseidoh a, ajahon eiho henga aphotchetsah-u ahin,

4Pathenin jong melchihna tampi le thil kidang tampi, bolmo kidang tampi to thoa adei dungjuiya Lhagao Theng ahoppeh a ahettoh sahpi ahi.

Huhhingna po doh masapen

5Iseiyu vannoi leiset ahung um doh got jong chun Vantilte noiya akoipoi.

6Chusangin mun khat’a akihettohsah bangin aseiyin: "Mihem hi ipi hiya ama ding hibanga nagelpeh a, Mihem Chapa chu koiham hibanga navil jing?

7Phat chom khat din Vantilte sangin noi nungjon nakoiyin, Leng bangin loupina le janna najemin,

8Thil ijakai akengto noiya nakoisoh tai," ati. Hichea ijakai aboncha anoiya akoina a hin imacha ama noiya lut lou aumpoi. Ahivangin tun thil ijakai hi anoiya lutsoh hel imudoh hih laiyui.

9Imuu chu phat chom khat dia Vantilte sanga noi nungjoa akoi Jesu chu ahin, Pathen lungset jal’a mi jouse dinga thina atepkhah tei ding jeh-in thina geiyin athohin, hijeh chun loupina le jabolna lallukhuh-in akijemtai.

10ijeh-inem itile ama vanga thil ijakai umsah-a, ama jal’a ijakai hinsah pan chapa tamtah loupinaa apui lut ding jeh a amaho huhhingna phutdohpa chun gim genthei athoh a asuh cham ding chu kitoh ahi.

11Aje chu asuthengpau le asuh theng ho chu agom’uva Pa khatseh akon ahiuve. Hijeh a chu aman jachatna beihel’a amaho chu sopite ahisah a

12asei chu: "Keiman kasopite lah a namin seiphong leng ting, Houbung ja lah a namin kavahchoi ding ahi," atin.

13Chukit le: "Keiman achunga katahsan kakoi ding," ati. Chujongle: "Ven, Pathenin eipeh chapangte le keima hi," atikit’e.

14ajeh chu chapangte hi thisan le tahsaphe kikop ahiuvin, aman jong amaho tobangin alim’u ahung louvin hitia chu thina jal’a thina chunga thunei vaipo, hiche Diabol chu suhmang ding agot ahi;

15chule thina kichat jeh a hinkhoa soh a kihen chengse chu lhadoh ding agot ahi.

16ama chun vantilte ding akhohsahjo pon, Abraham chilhahte ahujotai.

17Mipi chonsetna chengse akichulnam theina dinga, Pathen henga tahsan umtah le mihepi Thempu chungnunga apan theina dinga sopite lim le mel bang banga aumdoh ding hi kilomtah ahi.

18Hichea hi ama tah-in gim genthei ahoth a lhep patep’a aumjehchun, lhep patep’a umho chu akithopi theitai.

Hebrew Bung 3

Mose sangin Jesu achungnungjoi

1Chuti ahijeh chun van kouna changkha sopi thengte, i-hou thu’uva solchah le Thempu chungnung Jesu chu gelkhoh-uvin,

2Pathen insung pumpia Mose akitah banga ama jong apansahpa dinga kitah tah ahi.

3Ijeh-inem itile in sanga, in sadohpa jabolna achanjoh banga Mose sanga Jesu chu gamchenga loupijo dia kilom ahitai.

4Ajeh chu in jouse hi asadoh khat um cheh ahin, ahinla thil ijakai hi Pathenin asadoh-e.

5Khonung thusoh ding kisei ding ho hettohsahnaa Mose chu Pathen insung pumpia tahsan umtah lhachan anapange.

6Christa vang chu Pathen insunga Chapa thunei pen ahin, eihon i-hakat nau le ikison nau chule kinepna hi ituh chah jingu le ama insung ihidiu ahibouve.

Pathen mite dia choldo mun

7Chuti ahijeh chun Lhagao Thengin aseiyin: "Tunia a-ogin najah-u le

8Doumah bol nikhoa bang chun Nalung tahsah hih-un, Gamthip laiya kipatep nikhoa bangin:

9Napu napa teuvin eipatep’un eideh-uve, Kanatoh kathilbol amu’uvin

10Kum som li sungin. Hijeh a chu hiche khang mite chunga lung hanga, ‘Amaho hi lungthim chavai mong ahiuvin, Hijeh chun kalampi jouse ahepouve,’ kati ahi.

11Hia chun kalunghan jeh a kihahsel’a: ‘Amaho kacholdoh mun’a lut louhel diu ahi,’ kati aihye.

12Sopite, Pathen hing jinga kona pul lhahna dia nalah-uva mi koi hile tahsan louva lungthim gilou pu aum louna din ching theiyun.

13Nalah-uva chonset lhep lhah a lungtah cheh cheh aum louna din, "Tuni’ kiti aum laisen nangho khat le khat kitilkhouto jingun.

14Ijeh-inem itile abul’a pat’a i-hung kison nau chu akhon nigeiya ituh chah jing pouvu le eiho hi Christa to chan kikop ihitauve.

15Hichea hin akiseiyin: "Tunia a-ogin najah-u le Doumah bol nikhoa bang chun nalung tahsah hih-un," akiti.

16Ja taa doumah bol’a chu koi koi ham? Egypt’a kona Mose vanga hung potdoh chengse hilou ham?

17Kum som li sunga koi chunga lung hang ham? Chonsea gamthip laiya along lumden ho chung hilou ham?

18Amaho acholdo mun’a lut louhel dinga ahahsel khum ho chu hiche thu ngailou ho chu hilou ham?

19Hiti hin atahsan loujeh-uva alut thei louvu imutauve.

Hebrew Bung 4

1Hijeh chun kichau hite, achutiloule acholdo mun’a lut theina ding thutep um jeng jongle nalahuva khattou athon’a um khante.

2Ijeh-inem itile eiho jah banga ama hon jong Kipana Thupha ajah-u ahinan, ahivangin athu jah-u chun amaho aphat chomsah poi, ajehchu ajahon tahsan’a asanlouvu ahi.

3Atahsan eiho vang hi choldo mun’a chu lut ihiuve, hitia aseibang chun: "Kalunghan jeh-in kakihahsel’in, ‘Amaho kacholdo mun’a lut louhel diu ahi,’ kati," akiti. Leiset bulpi khom kiphu til’a pat natoh thilsem chu akichaisa ahitah vangin.

4Chuma le mun khat’a Ni sagi ni thudol aseiyin: "Chuin Nisagi lhin nin anatoh chengsea konin Pathen akicholdoi," ati.

5Chukit le hichea hin: "Amaho kacholdo mun’a lut louhel diu ahi," ati.

6Kipana Thupha ja masahon thu angai lou jeh-uva alut lou vangun, hichea lut ding chu mi aum jing nalaiyin,

7chuin "Tuni" kiti nikho dang khat atep kit’in, athu hi khonungin David kama aseiyin, akisei masa bang chun. "Tunia a-ogin najah-u le Nalung tahsah hih-un," ati.

8Ijeh-inem itile Joshuan amaho chu acholdosah hita le, aman kho nunga nikho dang khat um kit ding thu hi aseilou ding ahitai.

9Hijeh chun Pathen mite din Choldona khat aum nalaiye.

10Ipijeh-inem itile Pathen jeng jong anatoh na akona acholdo banga Pathen choldo mun’a lut pa chu anatoh akona kicholdo ahitai.

11Thu ngailouna jeh a lut louho umchan jop’a alut lou ium louna diuvin, chua lut’a choldo cheh din kihabol’u hite.

12ijeh-inem itile Pathen thu hi hing jing le na tong hat jing, hemto chemjam sanga jong hemjo, hinna Lhagao gu kisuhtona le lhin, hicheng geiya sukhen theihel’a sun thei, lunggel le lungthim ngaito hetoh paijen jeng thei ahi.

13Pathen maiya kilang lou thilsem aumpon, ichung thu i-lhutna ding pau mitmua chu thil ijakai hi asagoh keova kijam cheh ahibouve.

Jesu thempulen chungnung

14Van mun jouse jotpaiya Thempulen, Pathen Chapa Jesu ineijeh-un iphondoh-u tahsan chu tuhdet jing u hite.

15Ijeh-inem itile ihatmo lhahsam nauva eihu theilou Thempu chungnung nei ihipouvin, eiho banga imalam jousea lhep patepna tohsa, ahivanga chonsetna bei thempu chungnung ineiyui.

16Hijeh chun panpi i-ngai kom’u le alungset vanga hepina le panpina ikilah theina diuvin hangtah-in lungset laltouna chu nailut’u hite.

Hebrew Bung 5

1Thempu chungnung jouse hi chonset jal’a thilto ho le kilheina gan tha ho Pathen koma tohdoh dinga, mihem ho thalhenga mihem te lha a kiladoh a kipansah ji ahi.

2Amatah jeng jong lhahsam nan aumkimvel soh jeh chun imaheloute le lamvaite lung de-hattah a abol thei ahinai,

3ajeh chu mipi dinga kilhaina abol lou akhoh banga amatah jeng dinga jong achonset nau jeh a abol lou khoh ahi.

4Chule Aaron bang chun Pathenin akouna jeh tilouvin koiman hiche jabolna kintheng hi acham chamin akilah theipoi.

5Hitobang chun Christa jengin jong Thempu chungnung hi-na ding hi achamtah a kichoi-at nan aneipon amavang ajah a seipeh pan: "Nangma kachapa nahin, Tunia kahin nahi," ati.

6Hitobangma hin mun khat’a jong aseiyin: "Melchizedek themput dungjuiya Nangma tonsot’a dia thempu nahi," ati.

7Tahsaphe pua aum lai nikhon thinaa kona ahuhhing theipa henga Jesu chu o-thong leu le mit-lhi pumin thumna le taona neiya, Pathena akipeh thengjeh-in ataona aki-ngaipehin ahi.

8Chapatah ahijeng vangin thoh hesoh thoh-in thua nunje akihil them’e.

9Ama achamkimsoh phat’in ama thua nungte jouse din tonsot sochatna bulpin apangin,

10Pathenin Melchizedek themput dungjuiyin Thempu chungnung asahtai.

Tahsan’a lhahdah louna dia hilchahna

11Hiche thudol’a hin sei ding tampi kaneiyun, ahinla nakolseh tah jeh-un ahilchet ahahsai.

12Hitih chanpi hi mihil thei nahi diu ahitan, chutitah sangin khattouvin Pathen thubul kipatna lhongpi ho hil leu chun na-ngaikit nalaiyui, anham hilou bongnoitwi ngai nalaiyin naum’uve.

13Ijeh-inem itile bongnoitwiya kivah nalai chu chapang ahijeh-in adih thudol’a hetna ima aneipoi.

14Anham vang chu mi kikhan lhitsa ho ding ahin, amaho chu ahet thei nau mangchaa ase apha datkhenje themsa ho chu ahiuve.

Hebrew Bung 6

1Chuti ahijeh chun Christa thu bul kipatna lam chu dalhau hitin, philhinna ding lamjoh del’u hite; natoh thisa hoa kona lunghei ding bul phut kit louvin, Pathen tahsan thupou,

2batize thua kihilna pou, thenso-khut ngap ham, thinaa kona thokit thu ham, chule tonsot’a dia thutan thupou velsei daute.

3Hiche jong chu Pathenin pha asah le ibol diu ahinai.

4Ijeh-inem itile khatvei khovah changsa ho, van’a kon thilpeh chu atep khah-uva, Lhagao Theng changkhasa,

5chule Pathen thu phat dan tep khaa, khang hung lhung dinga thaneina hesa ahiuvin,

6amaho hi alhuh tah-u le, amaho tumtah a Pathen Chapa chu Thingpel’a khen beh kit’a lhang phong tah a taitoma aumsah-u ahitan, lungheina dinga semphat kit thei hoi ahitapouve.

7Ajeh chu Pathen kona phattheiboh achan jeh a leiset’in achunga ju-lha jing jeng gotwi adon’a, aphatchomna diuva lou kibolpeh ho dinga anche louhing ahinsep dohji ahin,

8amavang ling phung ho le simbiling ho asepdoh le pannabei ahitan, gaosap anaiyin, achaina govam ding ahi.

9Deitahte, hitia kasei vangun thilpha cheh le huhhingna nanei jeh-un nachung thu’va kagin chat nau aum nai.

10Ajeh chu mithengte kin nabolsau chu nabol jingu ahin, Ama min ngailutna naphondoh-u ahitah jeh-in, hiche natoh nau asuhmil ding chu Pathen adih lou ahipoi.

11Akhonna geiya kinepna chu lhingkeiya akihetdoh kahsea natompan ngai banguva nang ho khat cheh hi napan diu kadei lheh jengui.

12Chutile nathaset lou diu, tahsan le thoh hat jal’a thutep gou lo chang ho umchan jom nahidiu ahiye.

Pathen thutep thonlou

13Pathenin Abraham thu atep chun ama sanga len jodang aum loujeh-in ama changseh akihahsel’in

14Keiman phatthei kaboh tei tei ding, punjong kapunsah ding nahi," ati.

15Abrahamin thoh hattahin thutepga akimutai.

16Chujongle mihemten amaho sanga chungnung jo chu kihahselna aneijiu ahin,chule thu kichetna dinga kihahsel na chun akah-uva kibaona jouse asuh chaiji ahi.

17Thutep goulo ding ho henga chu alung ngaito chu khelkit louhel ding ahidol kichentah a avetsah nom jeh a Pathenin kihahselna chu palai banga anei ahi.

18Hitia chu hiche thilbol nia kona hi Pathen kikheltih neilou le itih a jou thei lou ahi hea, hite ni jeh a ama koma kisel eiho hin imasanguva kikoi kinepna chu tuh chah dinga nasa tah a kitilkhou ihiuve.

19Hiche kinepna chu hinkho dia thihhat aiya ineiyu ahin, kichentah le dettah pondal sung lam geiya lut pai ahi.

20Hikoma chu Melchizedek themput dungjuiya tonsot’a dia thempu chungnunga pang Jesu chu eiho thalhenga analut masa ahitai.

Hebrew Bung 7

Melchizedek themput dol’a themputna

1Hiche Melchizedek Salem leng pa hi Chungnungpen Pathen thempu ahin, Abrahamin lengho agatha ahung kilekit lam chun Melchizedek-in agalamton phatthei aboh-e.

2Ama chu Abrahamin athil chomdoh jousea konin som a khat apen, amasaa Mechizedek hi ‘Kalengpa dih’ tina ahin, chujongle ‘Salem lengpa’ jong hin chamna lengpa kiti ahi.

3Ama hi nubei pabei, khanggui thusim neilou, hinnikho kipatna le kichaina bei, Pathen Chapa tobang ahin, a-itih a thempua pang jing jeng ahi.

4Lung gel’in ngaitouvin, ipului bulpiu Abrahamin athilchom hopsom a hop khat apehpa chu itobanga len hitam!

5Abraham chilhah ahicheh vangun Levi chilhah thempu mun chang ho chun Danthu dungjuiya asopiteu hijongle miholah akon hopsom’a khat lahna ding thu aneiyu ahi.

6Ahile Levite khangguiya kimatna bon neilou Melchizedek chun Abrahama konin hopsoma hop khat alan, chule thutep kisanpa chu phatthei aboh jenge.

7Chule mineojon asanga lenjoa kona phatthei boh khat akilah uvin, khatjoh a vang hin akilahpa chu hing jing ahidol hettohsahna aum’e.

9Chujongle Abraham jeh chun, hopsom’a hop khat kilahpa Levi jeng jong chun hopsom’a hopkhat apei tia sethei ai.

10Ajehchu Melchizedek chun Abraham agalamto pet’a hi Levi chu apu Abraham taiguiya um nalai ahi.

11Mipi dia Danthu kipeh lo na Levite themput dol’a chu chamkimsohna umthei hile Aaron themput dol’a kisei louva Melchizedek thempu chom dang khat umdoh khoh ngai ding ham?

12Hiche achung chang thudol akikhel le Danthu jong kikhel teiji ahi.

13Hiche achung chang thudol kiseipa hi phung chom’a kon ahin, hiche phunga kon hin koimacha maicham phunga lhachan apang kha hih laiye.

14Akichen veng tai, ajeh chu i-Pakaiyu chu Judah phunga hung kon ahin, hiche phunga themput dol hi Mosen ima aseipoi.

15Melchizedek tobanga chu thempu chom dangkhat akitundoh phat hin athu hi gamchengin akichen kit tai.

16Ama themputna hi tahsaphe Danthu thupeh dungjui ahipon, mantih neilou hinkho khat tha neinaa konjoh ahibouve.

17Ijeh-inem itile hettohsah nan: Melchizedek themput dol’a Nangma tonsot dia thempu nahi,” akiti.

18Chujongle thupeh masa chu alhah sam jeh le aphatchom loujeh-in akinoi mangtai.

19Ijeh-inem itile Danthun imacha achamkimsah lou phat’in, kinepna pha cheh khat ahung kipolut tan, hiche kinepna jeh hin Pathen kom anailut’uve.

20Hiche hi kihahselna beiya ahipoi, adang ho vang chu kihahselna beiya thempua pang anahiuvin,

21Ama vang hi ajah a kihahsel na to lhon’a kiseipeh-a “Pakai akihahseltai, Lung akhel kit lou ding ahi; ‘Nangma tonsot’a dia thempu nahi,’ tin,” ati.

22Hiche dungjui hin Jesu chu Kitepna phajo phutdet’in apangtai.

23Chule masanga chu thi nan asuhmoa aumden jing thei loujeh-uva mi tampi thempua anapang ahiuve.

24Hichepa vang hi tonsot’a um jing jeng ahijeh-in themputna chu adang khat’a kichon thei ahipoi.

25Ama hi hing jing ahijeh-in ama jal’a Pathen henga hung lut jouse chu amaho thalhenga taopeh a, abonchauva ahuhhing chamkimsoh thei ahi.

26Chuti ahijeh chun chutobang thempu chungnun, athen a theng lepthol bei, boh beh lou le chonsete lah a kona kikhenhel, van mun ho jouse sanga chungnung joa kitung doh chu eiho dinga kilom mong ahi.

27Thempu dang ho banga aman niseh le amasaa ama chonset then sona ding chule miho chonset then sona dinga kilhaina gantha atolou akhoh poi, ajeh chu amatah kilhai na gantha dia akitodoh jeh chun khat veiyin asubulhittai.

28Danthun lhahsamna nei mihemte thempun anapansah jin, amavang Danthu nunga hung umdoh kihahselna tun vang tonsot’a dia chamkimsoh Chapa chu apansah tai.

Hebrew Bung 8

Aphajo kitepna thah thempu

1Akisei thulu chang pen chu: eihon hitobang thempu chung nung hi ineiyun, ama chu Van’a Chungnung pen Lalatouna jet lam’a atouve,

2chukoma mihem tundoh hilouva Pakai tundoh ponbuh tahbeh, muntheng chungnung sunga achamtah a kin theng bol’a pang ahi.

3Thempu chungnung jouse thilto hinchoi ding le kilhaina gantha toh dinga kitung ahin, hiche Thempu chungnung jong hin todoh thil khat aneitei ding ahi.

4Ama hi leiset chunga um hile Thempu jong hilou ding ahi, ajeh chu Danthu dungjuiya Thempuho lah athilto hinchoi ding aumnauve.

5Mose’n ponbuh ason ding kon’a akihilchahnaa, "Ajeh chu ven, molsang chunga nakivetsah lim dungjui banga ijakai nabol ding ahi," ati banga chu leiset’a thempu ho hin van chunga thil um lim le ale thoa kintheng bol ‘u ahibouve.

6Tun vang Jesu chu kintheng bolna pha chungnung achangtai; ajeh chu hiche hi ama palainaa kisemdoh kitepna pha cheh le thutep pha jo chunga kiphutdoh ahi.

7Kitepna masa chu nolnabei hile ni lhinna pamun ding kihol khoh ponte.

8Ahinla Pathenin miho chunga nolna amujeh-in aseiyin: "Ven, keiman Israel insung chung, Judah insung chunga Kitepna thah khat kasemdohna ding Nikho ho ahung lhunge’ tin Pakaiyin aseiye.

9Hiche kitepna chu Apu apateu kakhuttah a katuh a Egypt gam’a kona kahin puidoh nikhoa Amaho to kasemdoh tobang chu hilou ding ahi. Ajeh chu amaho kakitepnaa aum jing pouvin, Kenjong amaho kadonlou ahi, tin Pakaiyin aseiye.

10Nikho hijat nunga keiman Israel insung kakiteppiding Kitepna chu hiche hi ding ahi, tin Pakaiyin aseiye: Alunggil’uva Kadanthu ho peng ting, Hiche ho chu alungthim’uva kasut’a, Amaho dia a-Pathenu kahi ding, amaho kamite hidiu ahi.

11Koi hile tolsung khat’a achenpi le Koi ahiya asopi jah a, ‘Pakai hen, tia Ahil lou diu ahitai. Ajeh chu aneopen’a alenpan geiya Abonchauva eihetsoh diu ahitai.

12Ijeh-inem itile asuh khel nauva jong kahepia, achonset nau jong kageldoh kit lou ding ahitai.

13Hichea ‘Athah’ kiti hin amasa chu aluisah tan, ipi hile luiya, tehse chu abei ding kon ahitai.

Hebrew Bung 9

Leiset le van’a muntheng te ni

1Kitepna masa jong chun kintheng bolna Danthu le leiset’a muntheng ananeiye.

2Ijeh-inem itile houbuh akisondoh teng indan masapen’a chu thaomei khom le do khang chule Pathen um hetna changlhah to aumin, hilai chu "Muntheng" akiti.

3Hiche ban’a Houbuh pondal dan ni na chu "Muntheng chung nung" akitin,

4asunga chu gimnamtui halna sana maicham le kitepna thingkong-sana kitomkhum chu um ahin, kitepna thingkong sunga chu manna umna sana bel le Aaron tenggol pahmum chule kitepna songpheng ni chu um ahi.

5Achunga chu Cherubim loupitah ni uma, alhaving hoa chonset ngaidam kinbolna mun chu ale lhon ahin, hiti ho hi achen achaiya tua seijou ahipoi.

6Hitobang hin akisemin, hiche houbuh dan masa sunga chun lhacha kinbol molsoh dingin thempuho alut jing jiuve.

7Asung nung dan nina avang chun kumkhat sungin thempu chungnung changseh khat vei bou, thisan choilou hilouva, amatah le mipin hettoh louva achonset na ho’u thenso dinga galutji ahi.

8Lhagao Thengin kichentah a asei chu ahile, Houbuh dan masa adin laisea muntheng’a lutna lampi chu kilangdoh lou ding ahi.

9Hiche hi tulai phat sunga thilsoh ding tekahna ahin, thil to kilhaina gantha kichoijia kitoh ho hin kilhaina neiho het khenna lunghtim umdol bangin asuchamsoh theipoi.

10Neh le don chule twiya kisil theng thudol jatchom chom thubou ahin, kisemthah phat hung lhun kah a tahsaphe danthu jeng ahibouve.

11Ahinla Chrita chun khut’a kisem jong hilou, hiche thilsem lah a pang lou, Houbuh lenjo le chamkimjo ding jal’in thilpha hung lhung ho thempu chungnungin ahung pangin,

12kelchal ho le bongnou ho thisan vanga hilouvin, amatah thisan jal’in munthenga chun khat veiseh alut’in tonsot lhatdamna aphutdohtai.

13Ijeh-inem itile kelchal ho le bongchal hi thisan, chule kella ho pumgo vutvam kithekhum chun tahsaphe bohna neiho chu asuh theng le,

14tonsot Lhagao jal’a ama chamtah a nolnabeiya Pathen henga kilhaina gantha dinga kikat doh jeng Christa thisan chun Pathen hing jing lhacha kinbol dinga, athisa natoh chengsea kona, eihet khen nau lungthim ho hi gamchenga asuh thengjoh ding ahi.

15Hichejeh a chu Christa chu Kitepna Thah palaiya pang ahin, Kitepna masa chung changa suh khelna neiho lhatdoh dinga athina jeh a akikouho tonsot goulo ding thutep chu akisan thei diu ahitai.

16Ajeh chu Kitepna aum teng kitepna sempa thina phot chetna boltei ngai ahi.

17Ijeh-inem itile Kitepna chun kitepna sempa hinlaisen ima thu aneipon, athi nungle bou kiphutdetji ahi.

18Hijeh a chu kitepna masa jong thisan beiya kiphutdet lou ahi.

19Hichejeh chun Mose’n jong Danthu dungjuiya thupeh chengse mipi aseipeh soh phat’in, kella ho thisan le twito, ponsandup le hyssop alan lekhabu le mipi abonchauvin athe khumin,

20"Hiche hi Pathenin nang ho nathupehsau Kitepna jal’a thisan chu ahi," ati.

21Hitobanga chun houbuh le kintheng bolnaa kimang manchah jouse chu thisan athekhumtai.

22Danthu dungjuiya ijakai chu thisan’a suhthengsoh hel ahimaiyin, hijeh chun thisan solouvin ngaidamna aumdoh poi.

Christa kilhaina gan akithan chonset asuhbei

23Hitobanga hi van mun hoa thil ho lim vetsahnaa um thil ho jong suh theng tei ding ahin, ahin van thil tah tah ho dia kilhaina gantha phajo cheh ngai ahi.

24Atah beh lim tobang khut’a kisa mun theng phunga Christa lut ahipon, amatah van’a lut’a tua hi eiho tha lhenga Pathen angsunga kilah jing dia um ahi.

25Thempu chungnungin ama thisan hilou choiya kumseh a muntheng phung alut banga Christa amatah kikatdoh dinga lut matchet ji ahipoi.

26Chuti hile vannoi bulkiphua pat aman hesoh genthei athoh matchet ding ahin, tun vannoi khag kichai kon hin chonset suhmangna din amatah kilhaina gantha din khatvei bou ahung kilahtai.

27Mihemte dia khatvei thia chujou teng thutanna lut ding hi gotsa ahi,

28hitobanga chu Christa jong mi tamtah chonset suhmangna dinga khatvei kitohdoh ahitan, chonset thua hilouva kinemtah a ama galdot jing ho huhhingna pe dia aniveina hung ding ahi.

Hebrew Bung 10

1Danthu chu thilpha hung um ding ho ale mai mai, alim tahbeh jeng jong ahiloujeh-in, kumseh a kilhaina gantha chu avel vel’a alha vangun kilhaina bol ho dingin imacha asubulhit joupoi;

2asuh bulhit hihen, khatvei seh kisuh thenga chu kilhaina bol ho het khenna lungthim sunga chonsetna ho chu chin jingna um lou hel hile ibol’a tang louva ahinchoi jing diu ham?

3Chuti tah sangin hiche ho chun kumseh-in chonsetna ageldohsah jotai;

4ajeh chu bongchal ho le kelchal ho thisana konin chonset ngaidamna aumpoi.

5Hijeh chun leiset’a ahung chun Christan aseiyin’ "Kilhaina gantha le thilto nadeipon, Keidin tahsapum joh neigonpeh tai; Ganpumgo thilto ho le chonset thensona thilto hoa jong Nalung lhaideh poi.

7Hichun keiman kaseiyin: "Vo Pathen ven, Lekhabu sunga kachung thu jempia kisun bangin Nangma lungdei bol dingin kahunge’ kati," tin aseiye.

8Masanga chu Danthu dung juiya kitohji hijongle, aman aseiyin "Nangma kilhaina gantha ho le thilto ho, ganpumgo thilto ho le chonset thensona thilto ho chunga nakipah pon, lung jong nalung lhaipoi," atin;

9chujouvin aseipaiyin, "Ven, nalungdei lam bol din, hikoma ka-ume," ati. Hiti hin ani channa chu tundohna din amasa chu asumangtai.

10Hiche Pathen lungdeiya chu Jesu Christa tahsapum, a-itih a dinga khat vei akitodoh jeng jeh chun eiho eisutheng tauve.

11Thempu jouse chu niseh a ding jinga kilhaina gantha thilto chu ato jing vangun hiche ho chun chonsetna ala mang thei dehpoi.

12Jesu Christan vang chonset thensona din, a-itih a dinga khatvei, kilhaina thilto chu atoh-in, Pathen jel lam’a atoutai.

13Chukelsen vang amelmate chu akeng chotpha akoipeh ding angah jinge.

14Ijeh-inem itile Aman thilto khatseh a asuh theng ho chu tonsot’a dingin achamkimsah soh tai.

15Lhagao Thengin jong eihettohsah nauve; ijeh-inem itile hiche jou hin aseiyin.

16"Ni nu nung teng le keiman amaho to Kakitepna ding chu hiche ahi, ati Pakaiyin; ‘Alungthim’uva Kadanthu ho kakhumpeh ding, Hiche ho chu alung gil’uva kasut ding ahin,

17chule achonset jouseu le Danthu asuh keh nau jouse Kageldoh kit louhel ding ahitai," ati.

18Chonsetna ho jal’a ngaidam umnaa chun chonset jeh a thilto ding angaitapoi.

Pathen naiyu hite

19Sopite, Jesu thisan jal’in eihon muntheng phung jot’a, sung lhah ngamna ineiyui;

20ajeh chu aman pondal banga amanchah atahsaphe eiho din lampi thah le ahing jing chu eihondoh peh tauve.

21Ama Pathen insunga Thempu lenin ahung pangin;

22hijeh chun lung dih tah le tahsan bulhingset’in chule het khenna lungthima thilse jouse kisop thengsel le tahsa kisil thengin nailut’u hite.

23Thutep chu tahsan umtah ahijeh-in iphondoh sau kinepna hi dettah-in tuh det jingute.

24Chule ngailutna le thilpha bolna lam’a khat le khat kisuh lip jing ding phate chan gel’u hite.

25Mi kon khat’in akikhop nau donda achon nau banga bol louvin, Nikho chu ahung nai dol namu ahitan, hatahin kitilkhou to chehjo’u hite.

26Ajeh chu thutah hetna kisan nung hin eihon chonset henasan boljom jing leu hen, chonset suh mangna ding kilhaina gantha kikhenlou ahitan,

27doumah bol jouse bahgam hel ding le kavam hel ding tom ngaina meikong le thutanna ngah a kicha jinga um ding ahitauve.

28Koi hile Mose Danthu nahsah lou chu mi ni hihen thum hile hettohsah jeh a hepina beihel’a kithat ding ahi.

29Chuti ahile Pathen Chapa keng chotpha nei, akisuh thengna Kitepna thisan suhboh a chule lungsetna Lhagao daithang ho chun itobang khohjo cheh talen amat diu kilom nasah um?

30Ijeh-inem itile: "Phulah chu kei kin ahi, Keiman lethut nange," Chukit le: "Pakaiyin amite chung thu atan ding," tipa chu koi ahi keihon kaheuve.

31Pathen hing jing khut te nia chuh khah ding chu kichat umtah ahi.

32Masanga khovah nachan nung geiyuva jong hesoh genthei hahsa tah thoh a napan laiyu nikho ho geldoh-uvin.

33Hichea chun genthei thoh pum puma japi vetchah din naum’un, ahinla nang hon jong hitobang thoh ho chu nathoh piu ahiye.

34Ijeh-inem itile songkul lut ho geiya nathoh piuva, chule apha cheh le a-itih a um jing ding gou nanei nahet jeh-uvin naneiyu kichom jeng jong kipah tah-in nathoh jo’uve.

35Hiche hin kipaman lentah nasodoh peh jeh-uvin nakison nau chu paimang hih hel’uvin.

36Ipijeh -inem itile Pathen lungdei bol’a thutep kisan na din thoh hat jing ding angaiye.

37Ajeh chu: "Chomcha khat jou teng Ahung ding pa chu hunga Geisang lou dig ahi;

38Tahsan jal’a kei dia midih changa chu hing ding, Anung chon vang achunga kahinkho kapeh lou ding ahi," ati.

39Eiho vang manthahna dinga nung chon ho ihipouvin, tahsan jal’a hinkho hoidoh a um ho ihibouvui.

Hebrew Bung 11

Tahsan

1Tahsan hi kinepna atahbeh a lah a, muthei lou thil ahisa koi ding hi ahi.

2Hijeh a chu tahsan jal’a upate chu hettohsah a kipansahji ahiuve.

3Tahsan na jeh a Pathen thusah a vannoi kisem le akilangdoh kha lou thil hoa kona muthei thil hung umdoh dol ihet’u ahi.

4Tahsan na jeh a Abel’in Cain sanga Pathen henga kilhaina gantha thilto phajo atojeh-in, amidih hi na hettohsahna amun, Pathen jengin jong athilto ho chu ahettohsah tan, chule athi nung geiyin thu asei thei nalaiye.

5Tahsan na jeh-in Enoch chu thina mulouvin atahsa akheldoh peh-in, Pathenin atasan akheldoh peh jeh-in koiman aholdoh joutapoi; tahsa kheldoh a aum masanga Pathen koma lung lhaina kimu ahi hettohsahna aum’e.

6Hijeh chun tahsan beiya Pathen lung tohoi ahipoi; ijeh-inem itile Pathen aum je le ama holte chengse tohphat man apeh dol hi ama kom nailutten atahsan tei diu dol ahi.

7Tahsan na jeh-in Noah chun kho nung thilsoh ding muphah lou thua hilchahna thu angaiyin, ama le a-insung huhhingna din kong innei khat asem’e, hichea hin vannoi themmo achanin, tahsan’a them channa jal’in goulo chu achangtei.

8Tahsan na jeh-in Abraham chu potdoh a goulo dia akisan ding mun’a lut din akikou chun thun anungin, hoilam jot ding ahet lou vangin apotdoh jenge.

9Tahsan na jeh-in tepna gamsunga hung kholjin bangin apem len, tepna gam alopi ding Isaac le Jacob chutoh ponbuh sunga acheng leuve.

10Ajeh chu Abrahamin Pathen gontoh le asah doh bul dettah chu akat jing’e.

11Tahsan na jeh-in athuteppeh pa chu tahsan umtah ahidol ahetjehin acha nei phat akilet tah vangin Sarah-in naovopna thei tha aneitai.

12Hiti chun mithikonsa paa kon chun van’a ahsite jat le Twikhanglen kama neldi jat hel simsen lou chilhah apeng doh tai.

13Amaho chengse hi tahsan ahitauvin, thutep chengse chu akisan man louvu ahitai; ahinla gamla tah a konin amu’uvin alem’un, chule amaho chu leiset chunga kholjin le khopem ahiu aphongdoh tauve.

14Hichea hitobang thusei ho hin pugam pagam ahol dol’u aphondoh u ahibouve.

15Amaho ahung kondoh nau gam chu geldoh kit hileu kilekitna ding phat gomkom jong anei diu ahi.

16Tua la amahon aphajo cheh khat, van gam chu atup’u ahijeh-in, Pathen jeng jong amaho Pathen a kikou ding jahcha lou ahi; ijeh-inem itile aman amaho dinga khopi khat agonpeh ahitai.

17Tahsan na jeh-in Abrahamin patep’a aum chun thutep changpa tahsan vangin achapa chang khatseh, Isaac chu kilhaina gantha banga todoh jeng din agoi.

18Ama chule Isaac a kon ahi nachilhah kisim ding ahi," tia kiseipeh ahin,

19Pathenin athisa jong akaithou kit thei chu agel jon, tekah a seidin Isaac chu anung chankit nai.

20Tahsan na jeh-in Isaac chun kho nung teng phatthei chang din Jacob le Esau phatthei aboh-e.

21Tahsan na jeh-in Jacob-in athi ding konin Joseph chapate ni phatthei aboh gol’in, atenggol chunga aki-ngamin Pathen alhaiye.

22Tahsan na jeh-in Joseph chun athi ding konin Egypt gama kona Israel chate potdoh ding ageldoh-in, ama gu le chang thudol’a thu apei.

23Tahsan na jeh-in anu le apan Mose apen nungin lha thum asel lhonin, ama chu naosen mel-hoi tah ahidol amu lhonin, lengpa thu peh jong kicha louvin aum lhon’e.

24Tahsan na jeh a Mose’n akhan lhit phat’a Pharoah chanu chapa kiti ding da ahi.

25Chonset’a chomkhat nopsah sangin Pathen mite to gim hesoh thoh khom ding akilhenjoi.

26Tohman san ding avetjoh jeh chun Egypt gama gou jou se sangin Messiah kihousetna chu thupijon agel’e.

27Tahsan na jeh-in lengpa lung han ding ging louvin Egypt gamadalhan, mit muthei loupa chu amu bangin abol’e.

28Tahsan na jeh-in kalchuh kut aphutdoh-in, cha peng masa sumang Vantil chun amahoa asuh khah louna din thisan chu athekhumsah-in ahi.

29Tahsan na jeh-in Israel chaten Twikhanglen chu tolgo jot’in ajot galkaiyun, Egypt miten chutia bol agot’u le twiyin achup lih gamtauve.

30Tahsan na jeh a Israelten Jericho khopi ni sagi avel’u le, khopi pal achimtai.

31Tahsan na jeh a Rahab notinun gam ve-lhi ho lung monga alhunsah jeh chun thu ngailou ho to akisuh mang tha tapoi.

32Ipi kaseibe ding ham? Gideon, Barak, Samson, Jepthah, David, Samuel chule themgao ho chengse thudol seisoh kei ding phat’in toh ponte.

33Tahsan na jel’in lenggam tampi ajouvun, adih aphutdet’un, thutep akisan’un, Phaisameigeo kam asingun,

34meikou laipi aphel mit’uvin, chemjem hem’a konin ahoidoh un, lhahsam na konin ahatdoh-uvin, galmun’a hatah ahiuvin, gamdang sepaite adeljam tauve.

35Numei hon amithi sa ho’u thoudoh kit akisan’uvin adang ho jong thokitna phajo cheh aneina diuvin huhdoh a aum diu anom pouvin, hesoh genthei thoh-in aumjotaove.

36Abang bang jong elbol le jepna thoh, bulput le songkul lut’in aum’uve.

37Amaho chu songin asep’un, thing-at’in a-attan’un, chemjamin athat’uvin, kelngoivun le kelcha vun kisil’in avah leuvin, vaichat le bolset thoh, genthei hesoh bolset’in aum’uve;

38vannoi leiset hi amaho umna hoi ahitapon, gamthip lai le mol le lhanga avah leuvin, songko dung le leiko dunga akisel’ui.

39Mi hijat chu tahsan na jeha hettohsah a apan vangun thutep ga chu alopha pouve;

40eiho beiya achamkimsoh thei louna diuva Pathenin ibonchauva dinga thilphajo cheh khat amu masah ahi.

Hebrew Bung 12

Pakai migahsalna

1Hettohsahna hijat pin meilhang banga eiumkimvel jehuvin einoh phahsah jouseu le ichunguva kaijing chonsetna hi pailhan, thoh hat tah-in imasanguva kilhai tetna lama hin lhaiyu hite.

2Tahsan bulpi le kikhomna Jesu lam kat jingute; aman amasanga koisa um kipana jeh chun jum le jachatna nahsah louvin thingpel’a thina geiyin athoh-in Pathen laltouna jet lam’a atoutai.

3Nahinkhouva nalhah dah-uva nalel louna diuvin, chonseten amadouna a thuse chujatpi aseiyu dou lhumkeipa chu geldoh jingun.

4Chonset louna lam’a nang ho thisan long leuvin napang hih laiyuve.

5Tilkhouna dinga nang ho chapate dol’a nakisei nau chu nasuhmil’u ahitai: "Kachapa, Pakaiyin nabolgimna chu isah louvin geldan, Aman naphosal teng jongle lung lhadeh hih-in;

6Ijeh-inem itile Pakaiyin angailut chu abolgim’a, Chapa dia akisansa chu ajepji ahibouve," kiti chu.

7Bolgimna chu thoh tun tun’un, Pathenin chapate banga nasungse nau ahibouve; Pan chapa koipen gahchah louva akoiyem?

8Chate louvin um leu chun chapa tahbeh hilouva bolamcha nahi diu ahi.

9Hiche kalval’in jong tahsaphea eigah chah diuvin pate ineiyun amaho chu ijabol lheh-ui; achutile Lhagao ho thudol’a Pa koma chu ihinna diuva i-halut cheh joh lou diu ham?

10Amaho chun aphasah lam lam’uva ni chom khat kahseh a dinga bou eigah chah jiu ahin, Pathenin vang eiho phatna ding, ama thenna ichan theina diuva eithoh gimsah jiu ahibouve.

11Gahchah na hi apet tah le lung nopna ahipoi, lhaset nan akigel bouve; ahinla kho nung teng le hita bolgimna thoh ho ding hin them channa din cham nan ahung gadoh jin ahi.

12Hijeh chun khut ngoi hon domsangun lang, khup ngoi ho jong ding janguvin;

13Kengbaiya chu chatmoa um louva, adamjohna dingin nalampiu kisem jenguvin.

Pathen lungset donda jeh a gihsalna

14Mi jouse to kichamna ding le thenna ding hadel’un, hiche tilouva chu koiman Pakai amu louhel ding ahi.

15Koima Pathen lungsetna changlel aum louna ding le thingkha jung dondoh a tamtah asuhmo banga nasuhboh louna dingin ching theiyun.

16An neh khat man dinga a-upat kijoh Esau banga alop’a le chonthanghoi bol naum louna diu vin ching theiyuvin.

17Ijeh-inem itile kho nunga goulo tei ding adei chat vanga lunghei kitna ding mun anei tah lou jeh-in mit lhi puma ahol vangin vangbohna akipeh lou naheuve.

18Ijeh-inem itile nang ho toh khah thei molvum, meisi pah lah lah lai, muthim lai, thimpi lah, chule khopihui lah a hungvah lut nahipouvin,

19sumkon gin le thu kisei gin ki thong lah jong ahipoi; hiche japha ho chun ajah-uva thu chu akisei kit louna din ataojo tauve.

20Ajeh chu, "Molvum dung chu gancha ho jeng jong atongkha chan songa selih ding ahi," tia thu kisei chu athoh jouhel’u ahi.

21Chule hiche thil hung kilah chu kichat um behseh jeng ahin, Mose’n jong aseiyin, "Keima kakichan kakihot hot jenge," ati.

22Nang ho vang Zion molvum, Pathen hing jing khopi, Van Jerusalem, Vantil asang sang lah hung lhunga, kipah thanom

23le van’a kisun lutsah apeng masa chengse kikhopna, mi jouse thutan Pathen kom, them changsa ho Lhagao suh chamkimna mun,

24Jesu palainaa kisemdoh Kitepna Thah a chu hung nahitauvin, hiche thisan kitheikhum na chun Abel thisan sangin thilpha jo cheh sei ding aneiye.

25Ching theiyun thuseipa chu jopda khauvin nate; ajeh chu leiset’a thuseipa thujop louho bon ahoidoh jou lou le, van’a kona thuseipaa konin kiheimang leu hen ihoidoh louhel diu akichen jenge.

26Hichea ogin chun leiset seh bou aholingsoh ahin, tun aman athu tep’in aseiye, "Keiman leiset keoseh hilouva Van geiya khatvei seh akaho ling ding ahi," ati.

27Hikoma, "Khatvei seh," kiti hin thilsem jouse kiholingsah a kitolmang ding kichentah-in aseiyin, hitia chu suh ling theilou chengse umden ding ahi.

28Hichejeh chun suh longhoi hilou Lenggam ikisan jeh-un thangvahna neiyu hitin, ginna le jabolna pumin alungdei lamtah-in Pathen lhachan pangu hite.

29Ijeh-inem itile i-Pathennu chu mi kavamhel thei meikou tobang ahi.

Hebrew Bung 13

Pathen lungdei tah a natoh

1Kisopi ngailutna um jing hen.

2Maljin lhunsah ding hailou jen’un, hitobang hoa hin abangin jong Vantilte geiyin alhunsah tauve.

3Sohchang kihen ho chu toh kihentha bangin kigel’in lang, tahsaphea um jing nahi heuvin lang genthei hesoh thoh te chu geldoh jinguvin.

4Kichen hi mi jousen jabol cheh hen, jalkhun jong kisuhboh da hen; jonthanhoi bol le mijito jonga chu Pathenin athu atan ding ahi.

5Sum ngailut hinkhon kimang hih-un, nanei chengsen lung lhai jo’uvin; ajeh chu aman, "Keiman kadonda louhel ding, dajong kada lhah louhel ding nahi," ati.

6Hijeh a chu eihon kisongtah a isei theiyu chu: "Eipanpia chu Pakai ahin kicha ponge, Mihemin i-eilo ding ham?" ti hi ahi.

7Nalamkaiteu nakom’uva Pathen Thu naseipeh teu chu geldoh-un lang, anun akhan’u phatah-in geldoh-uvin, atahsan’u chu tho’uvin.

8Jesu Christa chu janhi tuni chule tonsot’in abang ahijinge.

9Thuhil gotchom chom kilhoh mangsah loujen’un, lung hi lungsetna aphudet aphan, neh le chah a phu ding ahipoi, hiti neh le chah thua chonte chun phat chom nan aneideh pouve.

10Houbuh a lhacha kintheng bol hon aneh thei lou nau maicham aneiyui.

11Thempu chungnung hon chonset thensona ding gancha ho thisan chu muntheng chungnunga ahin choilut jiuvin, atahsapum ho vang chu polama agouvamji tauve.

12Hijeh chun ama thisan’a mipi suh thengna dingin Jesun khopi kelkot polam’a thina athoh tai.

13Chuti ahijeh-in ngahmun polam, ama henga potdoh-u hitin, ahouset nau chu gathoh hu hite.

14Ijeh-inem itile hikoma hin eihon khopi det inei pouve, ahung lhung ding khopi joh chu i-hol’u ahibouve.

15Hijeh chun Jesu jal’in vahchoina ho chu Pathen henga kilhaina bangin bol jingu hite, hiche hi ama min phongdoh ho kamsungsoh aga ahi.

16Kikhoto them’a chule ima kikop del chu hai hih-un, hitobang hi Pathen lung lhaiselna kilhai na ahi.

17Nalmakaiteu thun nungun lang athu ngaiyun, nang ho ding thua mopo ahijeh-un, nahinkhou avettup jing jengu ahi; hiti hin bol leu chun kipah diu ahin, achuti loule lungna diu, nang ho dia phachom lou ding ahi.

18Keiho neitaokop jingun, ima lam jousea hoikom hijongle adih kabol nom jeh-un hetkhanna lungthim phatah neiya kigingcha kahiuve.

19Nang ho henga dia eikilhadoh vahna dinga neitaopehna diuva atumbeh a kahin ngeh nahiuve.

Taokhum khana le salam

20Chamna Pathen, tonsot kinepna thisan jal’a kelngoite ching minthang i-Pakaiyu Jesu thinaa kona hinpuidoh kit pan

21alungdei lam bol dingin thilpha jousen navon kimsoh-u hen; Jesu Christa jal’in amasanga alung lhaina bol din ichunguva bol hen, Christa chu tonsot tonsot geiyin loupi jing hen: Amen.

22Sopite, kitilkhouna thu hi angaije them dia ka-ngeh nahiuve, ajehchu keiman paltan’a nahenguva kahinsut ahi.

23Isopiu Timothy alhadoh-u anaheuvin, ahungvah le nang ho vea kahung teng hinpui nange.

24Nalamkaite jousen le mithengte chengse salam’un; Italy gam miten nasalam’ui.

25Lungset nan nabonchauvin umpi hen.