Guhthima eipanhu jing

Guhthima eipanhu jing

Penicillin lou hungkibol doh hin mihemte damtheina ahin kikhel doh sah e. Hiche hung kibol dohma 1940 masang chun lungnou ho kon a natna hi natnakhoh tah ana hin alo na jeh ana hepouvin mitam pi ana thithi jenge. Ahin penicillin louva kon in, hinkhotampi ahung ki huhdoh e. Hiche hinboldohpa chu 1945 kum in pachatnaloupi “Noble Prize” ana kipe e.

Natna lung ho chun tahsadam theina lung ho chu ei ho hetphat louva ana tha jing u ahi. Ama ho chu itahsa sunguva ana cheng ahiuve. Hiche guh thima natna lungno ana thah ho chu thisankang (white blood cells) ho ahiuve. Ama ho chu Pathen in natna a kona eina ventup sah jing u ahi. Thisankang ho chun natna lungnou ijat ana thauva, mihem hinkho ijat ana huhdoh u hetpeh in ana um pouve. Athilpha bolnao chu mi themcha bouvin ana he-phah in ahi.

Pathen in jong hitobanga hi eijendam jing u ahi. Thilse khat ichunguva alhunteng leh Pathen isei se kha jiuve. Ahin Aman seiphat ding deichatnan thil abol poi. Nitin in lupna kon in ithou un, ikivonhoisel un, natong in iche un, school kaiyin iche un, neh le cha hol in ivah un chule ichele vale na kon in kisu kha louhel in damsel in ihung le lhun thei un ahi. Pathen in ikisuh khah theinao va kon a ijat vei chan eina huhdoh u ti akigel pha ji poi. Ahin toset ito teng u leh “Pathen hoiya um ham?” tin isei kha jiuve.

Pathen in kei khela thilloupi tamtah abol ho kagel doh teng (Is 25:1), Ama henga thumna kanei sanga kipathu ka tamsei joh ding ahi ti ka gel doh e. –Julie Ackerman Link

Hetphat louvin lamchomchom in Pathen ihinkho u akai hoi jinge,

Ama phattheiho hi tekah pi jou ding aum poi-

Hicheho jala Ama chu ivahchoi jing diu ahi. –D. De Haan

Ama vahchoi thei nadin Pathen in eihil jing uve.

Simbeding Bible Chang Isaiah 25:1-9.

Kiledohna Silent Helper. Our Daily Bread, July 15, 2008