Habakkuk Themgao Lekhabu

HABAKKUK THEMGAO LEKHABU

Thupatna

Habakkuk Themgao thusei ho hi, Christa pen masang kum ja sagi beikon lam, Babylon mite thahat laiya kija ahi. Habakkuk hi Babylon mite engse tah hon pumhat jeng thil abol’u alung natpin, Pakai henga, “Amaho sanga dihjo sumang mang jenguva, i-bol’a umthim beh nahim?” (1:13) tia hang ahi. Pakaiyin adonbutna chu, adei phat phat’a athuu atan ding, chule “Pathen akitah jal’a them changte chu hing diu ahi,” (2:4) ti hi ahi.

Adang chengse vang hin midihloute manthah ding le gaothu kisei le achaina lam a Pathen lal loupi vahchoina le Thuchihgil seipa tahsan mong aphondoh ahibouve.

Asung thu hopkhen

Habakkuk kiphin le Pakai donbutna 1:1-2:4

Midihloute manthahna 2:5-20

Habakkuk taona 3:1-19

Habakkuh Bung 1

1 Habakkuk Themgao koma Pakai thuphondoh chu hiche hi ahi.

Thudihlou Habakkuk kiphinlo

2 Vo Pakai, kataona najahna ding le pumhat thilbol lah a neihuhdoh na diuva ijat vei panpi ngaiya kathum ding ham?

3 Hitobang gimna hi iti neimusah ham? Hitobang thil dihlou kibol hi iti nadoujou hinam? Kajet kaveiya pumhat le manthahna jeng akibol’in, muntin a kinah le kisat thu jeng alenge.

4 Danthu la hatah-in akimangpon, pananbei ahi, thudih him him la akiboltapoi. Migilouten midih ho ajotho tauvin, thudih chu akileheisoh tai.

Pakaiyin adonbutna

5 Pakiyin amite jah-a aseiyin, “Nakimvel’uva namtin vaipi khu ve-lhi jing leu chun, datmo mo namudoh diu ahi. Ja jong leu chun natahsan jou lou diu thil khat bol kagot ahi.

6 Mi engse, umthim lou Babylon mite khu thahat kapeh a, vannoi gamdang dang gal’a jo dia kitoldoh ding ahiuve.

7 Mihem tijat le kichat chat abol’uva, kiletsah chu Danthua amandiu ahi.

8 “Asakolteu jong lutnute sangin ajangkhai jon, kamkei gilkel ho sangin ahangjo’uve. Asakol touthemteu chu gamla tah tah a hungkon jeng ahiuvin, asakolteuvin jong leiset achilthangsoh tai. Muvanlai thil matgot bangin amelma teu hamvi vin adelkhum’ui.

9 “Asepaiteuvin pumhat’in gal ajou jou jengun, ahung tengu le mitin atijasoh hel’e. Sohchang akaiyu la neldi jat aphai.

10 Leng ho noise tah-in abol’un, vaipote anuisat bep’ui. Anangjouvah kulpi aumpoi-akom a leipal asep sangun, alonvuh jengui.

11 Khohui bangin hamheo houvin akitol’un, athahat’u hi Pathen a aneiyu ahi,” ati.

Pakai koma Habakkuk kiphin kit

12 Vo Pakai, atil abul’a pat Pathen nahi jenge! Ka-Pathen theng, tonsot’a um jing nahi. Vo Pakai, ka-Pathen, Eihoidampu, talen eimatsah diuva Babylon mite hi nalhendoh a thahat napeh ahi.

13 Ahinla hitobang lepche le engse miho hi iti nadou thei ding ham? Namit la thilse vetna din athengval’in, thildih lou bol mite vetnom pon nate. Hijeh chun amaho sanga dihjo asuhgam gam jengu khu iti nathoh thei ham?

14 I-atile avaipo thupe beiya thanlomte le nga ho banga mihem hitobanga hi naumsah jeng ham?

15 Babylon miten miho hi, nga ngakoiya kikoi bangin akhaidoh doh jengui. Lenin atom tomin ajeldoh doh jengun, ami mat’u kipa pin asam sam jengui!

16 Alenu pikhu chibai boh-in, kilhaina geiyin apeuvin ahi, ajeh chu len a hi thilpha pen a agel’u aboldoh thei jeh-u ahi.

17 Hepina beihel’a, chemjam mang a namtin vaipi asuhgam gam jeng diu hitam?

1.5: Acts 13.41; 1.6:2 Kgs 24.2

Habakkuk Bung 2

Pakaiyin Habakkuk adonbut

1 Ka-intingvum a kaldoh ing ting Pakaiyin ipi eiseipeh a chule kakiphinna chu iti eidonbut’em gavenge.

2 Pakaiyin hitin eidonbut’in, “Gahvet’a simdoh jeng thei din, nahenga kaphondoh chengse hi leipheng chunga jihdoh-in.

3 Hung guilhung loulai ding ahijeh-in hiche hi jihdoh-in. Amavang phat chu hung lhung loi ding ahitai. Ken kavetsah hi guilhung tei ding ahi. Hung lhungvah lou banginkilang jongle, ngah hat’in, hung guilhung tei ding, kinomsot lou ding ahitai.

4 Athu chu hiche hi ahi: ‘Migiloute chu hingdoh louhel ding, amavang Pathen tahsan jel’a themchangte vang hingdoh ding ahiuve,’ kiti hi ahi,” ati.

Midihlou manthahna

5 Gou hi mi lhem lha ahi. Mi kilose chu kiletsah, choldo lou-thina bang banga chimtih beiya namtin vaipi aban bana gal’a ajo’uva alah lah jengu ahi.

6 Gal’a ajosa miten mitsen veuvin tin, athangsetnau amudoh-uva, “Nanei louhel kilah ho, mangthahsih seh-un! Min nabat ho’u chu chamlouhel’a lahpeh peh jenga haodoh dinga itih chanpi nabol diu ham?” tiuvinte.

7 Ahivangin nahetdoh kah, midang jotho nang jong bat le tham nadimsoh ding, cham louhel’a akan puma napeh ding ahi. Melmate hungun tin kithing thinga nalha ding, nachomgamsoh diu ahi!

8 Namtin vaipi tamtah nachomgam ahitan, ahingdoh chengin, natoltha jeh le vannoi pumhat’a nabol’a akhopi chengseu nasuhset jal’a, nachomgam diu ahi.

9 Ohe ada nahi! Pumhat a nalah thilkeovin na-insung nasemdoh-in, na-insung lungmon le tijat beiyin nakisemdoh-e!

10 Ven, nathilbol ho hin na-insung mite ajumsah ding ahi; namtin vaipi nasuhgam chun namanthahna bep aboldoh ahibouve.

11 Inbanga kise songho geiyin nang dou nan lhang asam’un, inkamhon nopnan adonbut’ui.

12 Ohe ada nahi! Thil dihlouva khopi phut’a, tolthi thisan phunga khopi tungdoh pa!

13 Najo tho namtin vaipi chu acholnau mohseh nahisah-in, anei jouseu meivamin alengtai. Thaneipen Pakaiyin hiche hi abol ahi.

14 Hinla leiset hin, Twikhanglena twi dimset banga, Pakai loupina lhingset’a ahetdoh diu ahi.

15 Ohe ada nahi! Nalunghan jal’in naheng nakom jouse nasujumin vetda nachansah soh keiye; jukham bangin lonle len nalhai.

16 Hichejeh a chu jabol tah sanga jumle jachat nathoh ding ahin, jukham banga nalonle le dingahi. Pakaiyin nachanlom talen nadonsah tei ding, jabol nachan jouse jumna kiledoh ding ahi.

17 Lebanon gammang lai navat chaiyin, tua min navat lhuh ding ahi. Gammang sa jouse nathat gamin, tua gamsa hon meidoiya nalha diu ahi. Vannoi namtin vaipi natha jeh le pumhat’a akhopi jouseu nasuhamng jeh a hitobang thil hi nachunga soh ding ahi.

18 Milimdoi semthu hi ija pang ham? Mihem semthu bou ahin, jouthu ahi. Paomo pathen hin asemdoh pa dia ipi thilpha abol theiya aginchat khoh ding ham?

19 Ada nahi! Thinghal kompi chu, “Thouvo!” natin, songhalsi khat jah a jong, “Kipatdoh-in!” tin naseiye. Koi semthun ipi naseipeh thei mong-em? Apolam dangka sanan kitom jongle, asunga hinna aumpoi.

20 Pakai vang a-Houin thenga apansai, a-Angsunga leiset’a mitin vaipi thip chet’in um’un!

2.3: Hb 10.37; 2.4: Rom 1.17: Gal 3.11: Heb 10.38; 2.14: Is 11.9

Habakkuk Bung 3

Habakkuk taona

1 Hiche hi Themgaopa Habakkuk taona ahi:

2 Vo Pakai, nathilbol kajatan, Katimul athou hel jenge! Thil loupi pi nabolji ho chu tulai keiho khangin jong bolkit’in. Lunghang jongle chun neihepi jinguvin!

3 Edom gama pat Pathen ahungin, Paran thinglhang konin Pathen Theng ahunge. Aloupinan van aselmangin, Avahchoina leiset adimtai.

4 Kolphe vah to ahung lhonin, Akhut’a konin kho avah lah lah-e; Hikom laitah akhu Athahat kisel ahi.

5 Amasanga natset alansah-in, Thinan anung jui din thu apei.

6 Pathen akho-ngai le leiset akilingin, Amit  vet’in namtin akithing’e. Tonsot lhang sang ho alhasuh-ui, Masang laiya ava le jina lhang ho chu!

7 Cushan mite kichat kamun, Midian mite tijat’a kithing kamui.

8 Vo Pakai, nalunghansah chu luidung ho ham? Nalungsat sah chu Twikhanglen ham? Meilhang chunga natouvin, Naminte gal najosah chun meilhang satah ho kangtalaiyin na neiye.

9 Thalpi kamsal san nakoiyin, Thalpi chang kap ding salhemin nakoiye; Nakolphet chun leiset apohkeh jenge.

10 Molsang hon namu phat’un akihot lhulsoh-un, Vanthamjol’a kon twi ahung long lhan, Leiset twipi chengse akinuh soh hel’un, Twi kidil changse jong sangtah tah-in aleng jengui.

11 Na thalchang pahlah lah le Na tengkol vallah lah jal’in nisa lha jeng jong ading den jeng lhon’e.

12 Lunghangin leiset napal tannin, Lungsan namtin nachonpeh jenge.

13 Namite le nalhentum Lengpa huhhing dinnakondoh tan, migiloute lamkaipa nasat lhun, anung jui chengse la nasugamtai.

14 Asepaite lamkaipa nathalchangin adot paiyin, keiho the cheh dia huise lang ahung beh pet, guhthim cha vaichate bol gentheiho abah pettah-in.

15 Nasakolten Twikhanglen achil thangun, hunei tah twipi aphon den jenge.

16 Hicheng hikajah le kati akihot jengin, kichan kanephu akithing thinge. Katahsa pumpi angoiyin, ding jong kadingdet theipoi. Eidel khumteu Pathenin talen apeh ding Thip beh chan ngah tange.

17 Theichang gada hen lang, lou ma lhosoh beiyin um hen, kelngoi chengse thisoh hel hen lang, bong buh chengse thisoh keihel jongle,

18 Kipah thanom jing ding kahi, ajeh chu Pakai Pathen hi Eihuhhingpu ahi.

19 Pakaiyin thahat eipen, sakhi bangin dettah-in eipansah sah-e; Molsang dunga jong olmo louvin eikoiye. 3.19 2 Sam 22.34; Ps 18.33