Peter Lekha Thot Masa

PETER LEKHA THOT MASA

Thupatna

Peter lekha thot masa hi hikoma “Pathen lhenchomte” kiti Asia Minor gam sah lam gamkol sunga kithe cheh Christian ho henga dia kisun ahi. Akisut lo napen vang-Christian tahsan jal’a bolsetna thoh ho tilkhouna dia kisun ahi. Atilkhouna hin-Thia thoudohkit, chule hungkit ding Jesu Christa jal’a Kipana Thupha amang chai. Hijeh achu hesoh genthei athoh ham diu, thoh hahsa hi atahsan’u kichen le kichen lou vettohna um ahidol, athoh lhum keiyu le Christa hung kit Nikhoa kipaman asan diu aseiye.
Hesoh genthei athoh laiyuva atilkhou to thon- alekha sim ding ho hi Christa to hingkhom ahiu ahetdoh diuvin atil’e.

Asung thu hopkhen

Thupatna 1:1-2
Pathen Mihuhhingna ageldoh sah 1:3-12
Thengsel’a hing dia tilkhouna 1:13-2 :10
Hesoh genthei pat’a Christian kin 2:11-4:19
Christian kineosah le lhacha kinbol 5:1-11
Thu chaina 5:12-14

1 Peter Lekha Thot Bung 1

Salam

1 Jesu Christa Solchah Peterin Pontus, Galatia, Cappadocia, Asia chule Bithynia gama kithecheh lhenchom sohchang ho,
2 Pa Pathenin ahet masah dungjuiya Lhagaova kisuthengsa, thua nung dinga Jesu Christa thisan kithekhum ho henga lungset le chamna nachunguva pung jal hen.

Hingjing kinepna

3 I-Pakaiyu Jesu Christa Pa, ahepina bulhin dungjuiya thina a kona Jesu Christa thodoh jal’a hing jing kinepnaa eihing thah kit’uva Pathen chu nun nom hen;
4 kemthei lou le boh beh lou chule
5 nang ho jong tahsan jal’a phat chaina teng phondoh dia gotsa kikoi huhhing na chu chang dia Pathen thahatnaa nakihongbit’u ahi.
6 Hichea hin phat chomkhat din patepna lamchom choma lung hem tah a nathoh tei diu hi jong le, hatah-in kipah tahnom’un;
7 hichun meiya patep nung jenga jong mangthei nalai sana sanga munlujo natahsan’u aphot chensah a, Jesu Christa hung kiphondoh teng vahchoina le loupina chule jabolna namupeh diu ahi,
8 Ama chu mu louva ngailua, tuchan geiya jong mu louhel’a tahsan’a seithei louhel’a hapa kipah a loupina dimset nahiuve;
9 ajeh chu natahsan lou na pen’u nahinkhou huhhingna nakimu’u ahitai.
10 Nang ho kipe ding lungsetna thudol gaothu anaseidoh Themgao hon hiche huhhingna thudol hi gunchutah a ahol’uva akholtohsau ahitai.
11 Koipen tah-in itobang dol’a itih phat laiya, asunguva cheng Christa Lhagaova kona, Christa thohgim ding le nunga aloupina ding ho chu ahettohsah masah a aphondoh ahidol, amahon akholtoh-u ahi.
12 Alhacha kinbol ho’u hi achang tum diuva hilouva, nang ho ding ahije ahenguva akiphongdohin, athudol hi tun van’a kona hinkisol Lhagao Theng jal’in Kipana Thupha nahung seipeh ho’uvin nahetsah tauve, hiche ho hi Vantilte jengin jong vetgun atup lheh jengui.

Hinkho thenga hing dia kouna

13 Hijeh chun kong kigah bangin nalungthim gil’in kigingun lungnemin Jesu Christa hung kiphondoh teng nakipe diu lungsetna a chun lhingset’in kinem jingun.
14 Sei ngai chate bangin um’un, masang na-ngol laiyu lunggul’a chonna chu jom hih-uvin,
15 chusangin nakoupau athen bangin nang ho jong nun le khan thengun,
16 ijeh-inem itile, “Keima kathenjeh-in nang ho jong thengun,” tin akisun’e.
17 Mi anatoh dungjui cheh a langneina beihel’a thutanpehji pa chu Pa nasah ngal’u ahile hikoma nakhopem sung seuvin ama chu ging lhumkeiyuvin.
18 Napu napateu hinpehson chonna homkeova kona mangthei sana le dangkaa kilhatdoh nahi louvu naheuve.
19 Nolna beihel le bohbeh louhel kelngoi nou Christa thisan lu tah a kilhatdoh nahibouvui.
20 Ama chu vannoi leiset bul kiphu masanga hetsa ahin, phat kichai kona hi nang ho khohsahna jeh a phondoh ahung um ahibouve.
21 Ama jal’a natahsan’u le nakinep nau chu Pathen koma aum theina dinga Christa thinaa kona kaithouva loupi sah Pathen tahsante nahiu ahitai.
22 Kisopi ngailut thengsel dinga thutah thua nunga nahinkhou nasuh thengu ahitah le khat le khat lungthim giltah-in ki-ngailuvin.
23 Nang ho hi tonsot’a um jing Pathen Thuhing jal’a athi thei hilouva thimo chilhah akona avel’a pengkit nahitauve.
24 Ajeh chu: “Tahsa mihing jouse hampa tobang ahin, Aloupina jouse jong hampa tobang ahi; Hampa agop jin, apah apuljitai;
25 Pakai thu vang tonsot’in aum jingnai,” akiti. Hiche thu hi nahenguva Kipana Thupha kiseiphong chu ahi.

1 Peter Lekha Thot Bung 2

Sopi hingjing le namtheng

1 Gitlouna jouse le doha lhep lhahna jouse phat lhemna ho le thangsetna ho chule kiseisetna jouse pai lhauvin,
2 naosen pengthah bangin huhhingna lama khantouna nanei theina diuvin, halpi beihel Lhagao bongnoi chu ngaicha jingun.
3 Ajeh chu nang hon Pakai mi khotona chu natep khahsau ahitai.
4 Chule Pakai, hing jing, Songpi, mihemten apai vanga Pathen dia lhentum manlu tah henga chun hunguvin,
5 nang ho jong song hing jing tobanga Lhagao in khat’a kisadoh a Thempu thengloi hiding, Jesu Christa jal’a Pathen santhei dol’a kilhaina Lhagao thilto toh ding nahiuve.
6 Ijeh-inem itile Pathen lekha bua hitin akisun’e: “Ven, Zion a Songpi katun khu, Inning khompi lhentum manlu tah ahi; Ama tahsan chan chu Jum kimusah louhel ding ahi,” ati.
7 Hijeh chun nang ho atahsante din manlu tah ahin, athasan lou ho din vang: “Insa hon deimoa apaiyu Songpi chu Inning khompipenin apangtai,” akiti.
8 Chule: “Kisuh khahna Song, Kipal lhuhna Songpi asohtai,” akiti. Thu chu angai loujeh-uva kipal lhu ahitauvin, hiti dinga chu umdoh ahitauve.
9 Nangho vang nam lhentum, Lengpa dia thempu, namtheng, Pathen mite nahiuvin, hitia chu muthima kona ama khovah kidangtah a nakoudoh Pau phatna chengse chu naphondoh diu ahi.
10 “Phat khat chun Pathen mite nahipouvin, Tunvang amite nahitauve; Hepina chang lou nahiuvin, Tun vang hepina nachangtauve,” akiti.

Pathen lhachate hinin hingun

11 Deitahte, kholjin le sohchang bangin Lhagao to kigalto jing tahsepha lunggul jousea kona kihei mang dinga ka-ngeh nahiuve.
12 Chidang namdang ten nang ho thilse bol’a naseina jenguva jong nanun nakhanu chu phatsah-uvin, chutile natohphatna jouseu amu’va, athudol akikhol toh nikho le Pathen avahchoi diu ahi.
13 Pakai jal’in mihem phudoh thuneina jousea nungun; lengpa chu aboncha chunga vaipo ahin,
14 gamvaipo ho chu thilse bolte talen matsah ding le thilpha bol ho seipha dinga Pakai sol ahiuve.
15 Ijeh-inem itile thilpha kiboldoh chengsea lungthim beiho ngolna kasanmo hel’a lha ding hi Pathen lungdei lam ahi.
16 Jalente bang hiuvin, amavang jelenna chu gitlou khuna neilouvin, Pathen sohte bangin um’uvin.
17 Mi jouse jabol cheh-un, kisopitna ngailu’uvin, Pathen gingun, lengpa chu jaboluvin.

Christa thohna vetkah ding

18 In mun lhachate ijakaiyin naPakaiteu gingun athu’uvin nunguvin, mipha ho le anun nem ho keo jong hilouvin, milungkhohho thun jong nungun.
19 Ijeh-inem itile mikhattouvin Pathen ahet khen them jeh a athoh ding lom lou gim genthei hesoh athoh le hichu ama dinga vangbohna hijo ahi.
20Ajeh chu chonsetna jeh-in min deng hen lang thip beh-in thoh thoh jeng leu chun ipi phachom am? Chusangin thilpha bolna chunga hesoh genthei thoh thoh leu chun hichu Pathen dia kipana ahi.
21 Christan nang ho dia hesoh genthei athoh a vetkah ding khat nadalhah peh-uva, nang hon ama khonung najui diu deinaa, hiche dinga chu kikou nahiuve.
22 “Aman chonset abolpon, Akamsunga jong doha lhep lhahna akimudohpoi,” akiti.
23 Houset achanin ahouse thuh pon, athohgim pet’in jong agihsalpoi; dihtah a thutanpa koma akipedohjoi.
24 Aman eiho chonset jouse atahsaphen apon, thingpel chunggeiyin apodoh-in, chonsetna jousea i-thiuva, themchanna a ihin theina diuvin aboltan, ama kijepna mahan eidamsah tauve.
25 Nang ho kelngoite banga vahcheh gam nahitauvin, tua nahinkhou vettuppeh Pa le na chingpau henga hung kilekit nahitauve.

1 Peter Lekha Thot Bung 3

Nupa-numeiho le pasal ho

1 Hiche bang chun numei jouse najipateu noiya kunjel’uvin, chutile thu ngailou ho jeng jong chu numeiho khanthem jeh a thu phalouva kihinsojo ding ahi;
2 nagin themjeu le nakhan themu, boh beh louhel chu vetsah-uvin.
3 Sampheh hoi le sana khi-o, leiset ponsil nihchen hoiya, polam thil’a kijem louvin,
4 Pathen angsunga manlu tah, chul thei lou, Lhagaova nunnem le lungnem, lungthimgil’a mihem giltah joh chun kijem’un.
5 Ijeh-inem itile masang laiya numei theng, Pathen’a kinem jing ho jong chu hitia hi anakijem ahiuvin, ajipateu thu thun anung’ui.
6 Sarah jong chu Abraham thun anungin, amapa chu Pakaiti geiyin aseiye; nang hon imacha ginglouhel’a amanu thilpha bol tobang chu nabol’u le achate nahiuve.
7 Hitobangma chun pasal hon jong numei ho chu alhasamjo, bel kehbai tobang ahi heuvin, jabol chansah-un lang, lungsetna hinkho naneikhomu jong ahijeh-in, chenkhompiuvin, chutile nataokhom nau suh noh phah a um lou ding ahi.

Adih jeh a hesoh genthei thoh

8 Achai nan nabonchan lungkhat hiuvin, kilainatto cheh-un, kisopi ngailut’un, kidipdap to’uvin, nun nem’un lang,
9 setna chu setnan thuh dauvin, houset chu house thuh hih-un, chusangin phatthei bohjo’uvin, ajeh chu phatthei boh lo dinga kikou nahibouvui.
10 Ijeh-inem itile: “Hinna ngailut ding deiya, Nikho phaho mu ding nom’an Gitlouna akonin alei tuh tang hen, Akamin jong doha lhep lhahna seida hen.
11 Ama chu agilouva konin kihei mang hen thilpha boljo hen. Chamna hol hen lang hichu jui jing hen.
12 Ajeh chu Pakaiyin midihte ave-lhi jingin, Atao nau angai lhi jing jenge; Thilse bolte Pakaiyin avesal jinge,” ati.
13 Nang ho thilpha bolna dinga tom ngaitah nahiule, kon nabolset diu ham?
14 Ahinla adih jal’in hesoh genthei thoh tahbeh jong leu chun anun nom nahiuve. Amavang hite ho ginna chun kicha loujen’un, lung jong lungkham hih-un.
15 Amavang nalungthim’uva Christa chu Pakai ahina bangin athengin geljingun, nasunguva um kinepna thudol chu adonga aum le kitoh chet’a donbut din phat jousen kigosademin um’uvin.
16 Lungnem le ginggeh chan bol’un, ima datkhenna pha neiyun, chutile Christa jal’a nachonphat nau seise ho chu athuseiyuva kijumso diu ahi.
17 Thilse boljeh a hesoh genthei thoh sanga, Pathen lungdei lam ahile thilpha boljeh a genthei hesoh thoh chu gamchenga phajo ahi.
18 Ajeh chu chonset jeh a nang ho dia Chritan hesoh genthei khatvei thoh a athoh a, midih lou ho dinga midih chun athoh a, nang ho Pathen kom na lhut theina diu abol ahin, tahsaphea thia Lhagaova hing ahitai.
19 Lhagaova chea, Lhagaova songkul lut ho henga thu agahil lhang lea,
20 Noah nikho laiya Pathenin lungde hattah a angauva, Kong innei kisui laisea Pathen thu ngailou lhagao ho chu agahil ahi; twisanglet’a kong sunga sohchaa chu mihem themcha, get seh bou ahiuve.
21 Tua chuche twisanglet lim’a kibol Baptize chan hin tahsaphe nen suhthengna hilouva, lungthim gelkhen themna phaa Pathen henga kitepna kisem’a, thinaa kona Jesu Christa thodoh jal’a nahuhhingu ahitai.
22 Jesu Christa chu van’a akaltouvin Pathen jetlam’a atouvin, Vantil jouse le thuneina, thahatna jouse ama noiya alutsoh tai.

1 Peter Lekha Thot Bung 4

Pathen lungsetna gouchingpha

1 Christan tahsphea athohgim bang chun nang ho chutobang din kivon’uvin, ajeh chu tahsaphea thohgima chu chonset’a kona ong doh del ahi.
2 Chuti ahijeh-in tahsaphea nahinna dingu phat um nalai sea jong hin, mihem lunggul lama hilouvin, Pathen lungdei lamjoh-in hungun.
3 Ijeh-inem itile khohsa louhel’a phat sotpi hi chidang namdangten atohnom lam jonthanhoi, huh, jinuh hat, nopsahna, julop, dan neiloule semthu doilim houlam’a kimang nahiuvin, hichu pha set tante.
4 Hichea hi nang hon amaho chonval manthahna chu najop lou phat’uva kidang saa natai pongjiu ahibouve.
5 Mihing le mithi thutan dinga kigosadempa ang’a amahon achung thuu akipeh lut diu ahinai.
6 Hichejeh a chu mithi ho jeng jong tahsaphea ahin laiyun, mihemdol’in athuu kitanta jong le, Pathen lama Lhagaova ahinna diuva Kipana Thupha agaseipeh ahiuve.
7 Thil jouse kichaina ding anai tai. Hijeh chun tao dingin lunglimgeh le kitim themin um jingun.
8 Imajouse chungvuma nang hon khat le khat ki-ngailutna giltah neiyun, ajeh chu ngailut nan chonset tampi jong akhujol theiye.
9 Phunchel louhel’in khat le khat kilhunsah to’uvin.
10 Pathen lungsetna Jatchom chom gouching phatah bangin, amitakip Lhagao thilpeh akisan cheh chu khat le khat kijento nan mang chauvin.

11 Koi hile thuseiyan Pathen thubou seihen; lhacha kinbol’an jong Pathenin apeh thahat dungjuiyin bol hen; chutile ima jousea Jesu Christa jal’a Pathen chu vahchoiya um jing ding ahi, Jesu Christaa loupina le thahat tonsot’a um jing jeng ahi: Amen.

Christian hijeh a hesoh genthei thoh

12 Deitahte, nang ho patepna dia nalah-uva meikou banga hung um chu, thil kidang nachunguva soh bangin datmo hih-uvin.
13 Chusangin ama loupina ahung kiphondoh teng le lhingset’a nakipana diuvin Christa thohgimna chu thoh khompijo’uvin.
14 Nang ho Christa min jal’a houset nachan’u le anun nom nahiuve, ajeh chu loupina le Pathen Lhagao nachunguva hung chua ahitai.
15 Nalah-uva koi hile toltha jeh ham, guhchat jeh ham, mi tohna chunga khut lhah jeh ham jeh-in thohgim da hen.
16 Amavang Christian hijeh a thohgim’a chun jachatnan neida hen, Christian min chun Pathen choi-anjo hen.
17 Ajeh chu thutanna ding phat hung lhunga Pathen insunga kipanding ahitan, eiho chunga akipat masah le, Pathena kon Kipana Thupha ngailoute akichaina ding chu ipi hitan tem?
18 Ajeh chu: “Midih dinga huhinga um ahahsat le Pathen ngaisah loule chonseten hoilam asuh diu hitam?” akiti.
19 Hijeh a chu Pathen lungdeiya hesoh genthei thoh ho chun hitobanga chu thilpha abol jinguva ahinkhou tahsan umtah Asempau khut’a apehdoh diu ahi.

1 Peter Lekha Thot Bung 5

Pathen kelngoihon

1 Christa thohgimna hetoh le ahung kiphongdoh ding loupina chankhompi chule na-upat piu khat kahijeh a nalah-uva upate ka-ngeh nahiuve;
2 nalah-uva Pathen kelngoi hon um chu chingphauvin, bol lou phamoa vetup hilouvin, Pathen deidol’in lung chamtah-in boljo’uvin, alam louva phatchom ding deina jong hilouvin, lung guttenin bol’un.
3 Nakichinsah ho chunga kipiput sah louvin, kelngoi honin avetsuiya, ajui thei din umjo’uvin.
4 Ajeh chu kelngoi Chingpipu ahung kilah teng le nang hon chul thei lou loupina lallukhuh chu nasan diu ahi.
5 Hitobang chun khangdong ho jong upate thun nunguvin. Nabonchauvin khat’in khat chunga din kineosahna chu ponsil bangin kivon’un; ijeh-inem itile: “Pathenin mi kiletsahte adoudal’in, Kineosate chu lungsetna apei,” akiti.
6 Hijeh chun Pathen ban-gol kha tah noiya kisunemsoh keiyun, chutile aman aphat cha nachoisang thei diu ahi.
7 Nalungkhamna jouseu Ama chunga sep lhauvin, ajeh chu aman nakhankho diu agel nai.
8 Lung limgeh-un, kigingphauvin. Nakidoupi Diabol chu Phaisameigeo kitumlet lut banga, koi hijongle val lhum jeng dia vah lea ahol ahi.
9 Nadoupau chu tahsan nan kidinte piuvin, vannoiya nasopite jousen jong hitobang hesoh genthei thoh hahsa hi athohsoh keiyu nahetsau ahi.
10 Lungsetna tin cheng kimsoh Pathen, Christa jal’a aloupina dinga tonsot’a dia nakoupauvin, chom khat gim genthei nathoh jou tengu le nasem phat’uva, nasuhdet diu ahi.
11 Ama chu tonsot geiyin tha hatna chang jing hen: Amen.

Salam

12 Kageldol’a tahsan umtah sopi Silvanus kamanchah a hichelekha thot chomcha hi kahinsut’a, Pathen lungsetna atahbeh ahidol hi tilkhouva kahettohsah nahiuve; hichea chun dingdet jingun.
13 Lhenchom nahipiu Babylon gama um nu le kachapa Mark-in nasalam’ui.
14 Ngailut nan kichopto’uvin, khat le khat kisalam’uvin. Christa to hingkhom jouse nachunguva cham leng hen.

© Biblical material is used with the prior permission of the Bible Society of India, the copyright holders.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>