Peter Lekha Thot Nina

PETER LEKHA THOT NINA

Thupatna

Peter Lekha Thot Nina hi Christian masa tampi hop’a kisun ahi. Adoipi pen vang-thuhil gilouva kona chon chatvaina asojeh a nel lhahna ding le jon thanhoi ngahna dia kijih ahi. Hitobang nel lhahna dia chu- Pathen le Pakai Jesu Christa hetna dih tah neiding, Jesu amit tah a mua athuhil jasa ho hetna chu hetna dih kiti ahi. Alekha sunpa hin Jesu hung kit lou dia seiho anel khup nom ahi. Jesu hungvah lou hi Pathenin koimacha achonsetna amangthah louva huhhing soh ding adeijeh a asei ahi.

Asung thu kihopkhen

Thupatna 1:1-2
Christian kikouna 1:3-21
Mihil lhem ho 2:1-22
Achaina Christa hungding 3:1-18

2 Peter Lekha Thot Bung 1

Salam

1 Jesu Christa soh, solchah a pang Simon Peterin, huhhingpa Jesu Christa le i-Pathen’u dihna jal’a keiho to kibang cheh a tahsanna chang jouse henga:
2 Pathen le i-Pakaiyu Jesu Christa nahet nauva konin lungsetna le chamna nachunguva lhingset’in pungjal hen.

Christian kikou le kilhen lo na

3 Ama loupina le aphatna chankhompi dinga eikoupau ihet jehuva, Pathen ngaisah a hintheina dia, thil ijakai aboncha a Pathen thahatna kona eipeh-u ahitai.
4 Vannoiya umsa tahsa lunggul manthahnaa kona jamdoh a, hichea kona chu Pathen hinna lim chu ichankhompi theina diuva, hiti thudol’a chu thutep chung nung pen manlu tah chu eipeh-u ahi.
5 Hichejeh tah chun najo chanin bol’un lang phatna chu natahsan’u belap sah-un, phatna chu hetna be lap sah un,
6 hetna chu kitim themna belap sah-un, kitim themna chu thoh hatnan belap sah un, thohhat na chu Pathen ngaisah nan belap sah-un;
7 Pathen ngaisahna chu kisopi ngailutnan belapsah un, kisopi ngailut chu ngailut nan belap sah-uvin.
8 Ijeh-inem itile nang hon hicheng hi bulhingset’a naneiyule, hichun i-Pakaiyu Jesu Christa nahet nauva chatmo le ga beiya nakoi louhel diu ahi.
9 Hicheng neilou mi chu mitcho, khomu lou ahin, masang achonsetna chengsea kona kisop thengsa ahichu asumiljitai.
10 Hijeh chun sopite, nakikou nau le nakilhendoh nau chu kichetsahna din kihabol cheh kit’un; chuti bol leu chun itih chan ajong nakipal lhuh lou diu ahi.
11 Hiti dol’a chu i-Pakaiyu le huhhingpa Jesu Christa tonsot lenggam sunga lutna thei lhingset’a nanei diu ahiye.
12 Nang hon nahetsau le naneisau thutah achu dettah a pangdet hita jong leu chun hiti hohi geldohsah jing dinga kagot ahi.
13 Hiche pon-in tobang tahsaphea kahin laisea, hiti thudol hea nang ho geldohsah jinga, mit hah jinga umsah ding hi dih kasai.
14 Ajeh chu i-Pakaiyu Jesu Christan eihetsah dungjuiyin pon-in tobang hiche katahsa hi kadalhah loiding kahetai.
15 Kapotdoh nung teng geiya hiche ho hi nageldoh jing theina diuva kajochan’a na habola kabol ding ahi.

Christa loupina le agaothusei

16 Keihon i-Pakaiyu Jesu Christa le ahung kit ding thu nang ho kahetsah-uva chu semthu thusim pou mangchaa seikahipouvin, alal loupina mittah a mua kaseiyu ahibouve.
17 Ijeh-inem itile aman Pa Pathena kona jabolna le loupina akisan’a, lal loupi chungnungpen a kona ahenga hung ging 0-chun “Nangma kachapa deitah nahin, nachunga ka lung alhai ta-ngeiye,” atipet tah chun
18 ama le keiho molvum theng chunga ka-umkhomuve, hiche ogin chu van’a kona hung ahi kajauve.
19 Hijeh chun Themgao thusei chu ginchatna dettah kaneiyun, nang hon jong khoh sah leu chun aphai, ajeh chu hiche hi munthim laiya khovah lhah geiya kivah tobang le nalungthim sunguva dia Jingvalpa vah tobang ahi.
20 Amasa hiche hi nahet diu ahi, Themgao thusei kisundoh jouse hi koiman achamtah a aledoh a ahilchet theidol ahipoi;
21 ajeh chu gaothusei khat cha beh jong hi mihem lungdeiya hung um doh ahipoi, Lhagao Theng cho-thouva mihemhon Pathena kona aseidohji ahibouve.

2 Peter Lekha Thot Bung 2

Themgao lhemho le mihil lhemho

1 Mipi lah a Themgao lhem  ho anaum banga chu, nang ho lah a jong mihil lhem ho hung sohdoh diu ahi; amaho hin manthahna thuhil lhem ahinpoh doh-uva, amaho chodoh Pakai jeng jong aseilep diu, man gangtah a achunguva manthahna akilhut khum diu ahi.
2 Tampin ahuh nau nung ajuiyuva, amaho jeh a chu thutah lampi jeng jong taitom’a hung um ding ahi.
3 Jou thua kiloset sumkolveina nahin nei dingu ahi; ahinla masanga pat achung thuu kitansa chu akipel hih laiyin, asumang pau jong alulhu hih laiye.
4 Pathenin Vantil chonse ho jeng jong khen louhel’in Damun’a aleh lut jengin, hikoma chun Thupi tan ngah din muthim lah a thih khaovin ahen’e.
5 Pathen helou leiset, leiset masa, twisang alet khumsah a asuh mang chun khen aneipoi, them channa thuseiphonga pang Noah le adang mihem sagi chubou akhendoh-e.
6 Sodom le Gomorrah khopi te ni chung thu atan jong chun vutvam asosah jengin, Pathen ngaisah lou ding mite chunga thu soh vetkah nan asumangtai.
7 Huh lama kipe, chonseho jal’a hesoh gentheiya um midih Lot chu ahuhdoh-e.
8 Ijeh-inem itile hiche midih chu alah-uva chenga, danbeiya athilbol ho’u ani nia amua, ajah le them changa um ahinkho jeng jong hesoh genthei thoh a um ahitai.
9 Pakaiyin Pathen ngaisahte patep’a aum nauva kona huhdohje ahen, adih lou ho thutan nikhoa talen matsah dinga koije jong ahei;
10 ahideh chun tahsaphe lunggul lam jenga kipea chon ho, Vaipopa nah sah lou ho ahiuve. Amaho hi angol han’un, alung chamin achon’uvin, loupina changsa ho jeng jong taitom ding akicha pouve.
11 Ahinla Vantilte chu amaho sanga thunei le thaneijo ahi vangun, Pakai ang sunga amaho houset’a taitomna ima ahinlhut pouvin ahi.
12 Hiche miho vang hi lungthimbei, gamsa tobang, amangthah dinga mihem ngaiya pang mai mai ahiuvin, hetna beiya taitom ahiuve; hijeh a chu amanthahna diuva mangthah tei diu ahi.
13 Alam louva abol man’u adih lou akisan diu; sun chang laiya aning anop’a chonjeng hi lung nachimna ageluva, boh beh le nolna um ahiuvin, doha nalhep’uva nopsahna dinga nang ho to ankong aumkhomjiu ahi.
14 Amit’u la jongthanhoi na ding adimset’in, chonset bol la atang theipouve; hinkhoa dindetna beiho chu ajol lhauvin, sumselna lam jenga kihil themsa lungthim aneiyun, sapset chang chate ahiuve.
15 Amahon lam jang adalhauvin, lamhilouva akihei mang gam’un, athil dih lou bolnan sum deichaa Besor chapa Balaam lampi joh ajuitauve.
16 Ahinla Balaamin Dan asuh khel jeh chun pho na achangtan, Paomosa-nganin mihem paovin thu aseiyin Themgaopa ngolna chu asutang tai.
17 Amaho hi twi kangsa, twisamphung ho le khopi huiyin alhoh mangji meilhang ho tobang ahiuvin, amaho dinga muthim lhangkhal jing lai chu kikheh khol ahitai.
18 Ajeh chu amahon hamhoi tho nan, manlou pou aseiyun, vahthai ho lah a um, hung jamdoh nah nah ho jong tahsaphe ngaichat, huhna lama ajol lhajiuve.
19 Ajol lhah ho’u chu jalen din atepeh-un, amaho tah jongla kemmang thei soh a kihen joh ahi tauve, ajeh chu galjoupan ajosa chu soh a anei ngai mong ahinai.
20 Ijeh-inem itile i-Pakaiyu le huhhing pa Jesu Christa hetna jal’a vannoi leiset kisuhbohna tin chenga jamdohsa mihem chu, hichenga akihen-oh kit’a hicheng chun ajokit teng le aum chan’u chu amasaa sangin gamchengin akhoh cheh jitai.
21 Hi jeh chun ahet nunguva, amaho kipe, thupeh thenga kona akihei mang sangun, dihna lampi chu ahet’a ahet lou hel’u hile pha jotading ahi.
22 “Uiyin aloh anehkit jin, silngimsa vohcha bonlhoh lah a akibol kitji,” kiti paochamtuh hi amaho chung thua adih lheh jengin ahi.

2 Peter Lekha Thot Bung 3

Pakai hung ding tepna

1 Deitahte, hiche hi kalekha thot ni lhin na ahitai, lekha te nia hi, thoh hatna jeh a lung ngaito thengsel nanei theina dinguva geldohsah a kahinsuh thoujiu ahi.
2 Masang laiya Themgao theng ho thuseina le Pakai le huhhingpa thupeh solchahhoa kona najahsau chu geldohsah kitna ding jong ahiye.
3 Amasan hiche hi heuvin, ni nukhah teng mi jontai hatten jontai jeng apat’uva, ama tahsaphe lunggul lam jenga hung chon diu,
4 amahon, “Ahung kitna ding thutep chu hoi lamba hitam? Ajeh chu ipu ipateu la athisoh tan, thilsem jouse hi la semtila’ bep bep’in aum jingin,” atiu diu ahi.
5 Ijeh-inem itile amahon Pathen thusah a kona masang laiya pat van umsa ahile, twi lah a kon, twi jeh a leiset kisemdoh jong hi henasa kihetmo sah ahiuve.
6 Hichejeh a chu chulai vannoi leiset chu twisanglenin achup’a manghel ahitai.
7 Hiche Pathen thu ma maa chu tulaiya van le leiset jong hi Pathen hephalou te chung thu kitan’a kisuhmang nikhoa dinga kikhen’a, meiya halvam dinga kikheh khol ahi.
8 Vo deitahte, Pakai dia nikho khat hi kum sang khat tobang ahin, kum sang khat jong nikho khat tobang ahidol hi sumil loujenun.
9 Mi kon khat’in ngongkaiya agel vangun, thutep dol’a Pakai chu angongkaipoi; koima manthah ding adeilou jeh a abonchauva lung aheisoh manna diuva, nang ho jeh a, kho-ngaisot ahibouve.
10 Ahinla Pakai nikho chu gucha banga hung ding ahin; ahung ni le chun van ho chengse ging lul lul’a, kitolmang hel ding, thilbul chengse meikouva jol mangsoh ding, vannoi lseiset le asunga um na kitong jouse jong kavam soh hel ding ahi.
11 Hitobanga hi thil jouse hung kisumang ding ahitah jeh-in, itobang dol ham’a nakigot diu akhoh tai, nun le khan, thenna lam, Pathen ngaisahna,
12 Pathen hungkitna ding nikho ho ngah jingle sunai jinga naum diu ahi; ahung lhun nikho le van ho chengse meiya kouva vamhel ding, thilbul chengse jong meiyin akah a jolmangsoh ding ahi.
13 Eihon ama thutep, adih jenga umna, vanthah le leiset thah chu i-ngau ahi.
14 Hijeh chun deitahte, hicheng hi kat jinga naum nauva, ama henga nolna beihel le boh beh louva nahung mudoh theina diuvin, chamdel’a um din kihabol’un.
15 Chule sopi deitah-u Paul’in ama kipe chihna dungjuiya nahenguva ahinsutsa bang chun, huhhing channa dia i-Pakaiyu mi kho ngaisotje hi gel’uvin.
16 Alekha thot ho sunga chu hiche thudol ho asei ahin, asunga chun het hahsa tah tah jong aumin, hiche ho hi lungdet lou hon Pathen lekhabu dang abolna bangun ahilkon le jiuvin, amaho manthahna akiboldoh lo jiuve.
17 Hijeh chun deitahte, nang hon vang hemasauvin lang, kiging phauvin, achutilou le Danbeiho manthahna chun nalhoh mang thauva, panmundetsa chu nalhaso khah diu ahi.
18 Chusangin i-Pakaiyu le huhhingpa Jesu Christa lungsetna le hetnan khangtou jingun, Amaa chun loupina tu le tonsot kum khon um jing hen: Amen.

© Biblical material is used with the prior permission of the Bible Society of India, the copyright holders.