Pathen in iti ei um piu vem?



Imphal, Trulock Theological Seminary a MDiv ka jil laiyin, Nagaland lang pan BTh hung jil Gl. Seimang Haokip in, nikhat thugil tah khat, lung dong tah in ei dong khan ahi. Hiche ei thudoh chu thugil tah ahi jeh in, ka sumil thei poi. A thudoh chu mite ho Pathen thu ka hilseh leh kamang cha jin ka hi.

Ka loipa hi khangdong cha a Bible jila hung ahi. Pathen thu leh Bible thu umdol hi ahetchet nom jeha hung ahi, athudoh a kon in kikichen tah in ka mu doh in ahi. Class sunga Bible thu kihilna jong lung lut tah in angaijin, chule jong oiya ho doh thei thei adong len ahi.

Ni khat ka lupna cheh lhona ka um lhonin, ei hin thudoh khat chu “Pastor pu, ka hetnom tahkhat aum in na hin dong ing ka te. Pathen in ei um piuve ti Pathen thusei hon asei jing un, ahin ei umpiu dan u hi iti ahi dem” tin ei dong in ahi.

Ken jong ama henga nang in “Iti ei umpiu hinte tia na gel mong mong em?” tia ka doh leh aman, “Kagel dan a, Pathen hi khat vei vei leh kamasanga um, khat vei vei leh kanunga um, khat vei vei leh ka chunga um, khat vei vei leh kalupna noiya um hi ding ham ka ti e” atin ahi. Hitia jong gel thei mong mong ahi nai.

Pathen ei um pi dan u, hetdohthei na pha chompi aum e. Bible (The Word) hi Pathen natoh dol mudoh theina ahin, chu le taona (Prayers) man hi eima hina kinemsaha Pathen thu lunga kigel a kikahdohna ahin, chule eima deilam sanga Bible thu toh kitoh joh jui (commitment) ho leh lamchom chom ahi je.

Bible akona Pathen umdol leh anatoh dol ho hetdoh thei ahi. Hetdoh theina dia jong Bible hi phatea sima, khola, dettah a tahsan ding ahi. Bible sunga thukisim doh ho hi, thilsoh ngen phate cha kisun ahi. Mihem lung gel hilouva, Pathen in amite ho henga Aum dol ahetsah a ki sundoh ahi.

Bible sunga Pathen umdol leh adei ho het doha, hiche banga chon chu Pathen in ei um piu het doh theina khat ahi. Pathen hin vannoi mi jousea ajui le le a, avet lhih le le ahi poi. Athu tah joh chun ilung gel dan u, ilam lhah u leh ikho sah dan u chu ajui ahi.

Jesun ajah a, “Keima hi Lampi le Atah chu le Hinna chu kahi, Keiya kona chelou chu koima Pa kom alhung theipoi (John 14:6)” ati. Jesu Christan adei chu Ama hi Lampi aki ti leh hiche lampia chu che ding tina ahin, Atah ati chu ahi leh ahitahbah asei na ahin, hiche te ni tahsana jui ho chun Hinna anei ahin, hichu Pathen in eium pi nao phon dohna ahi je. Pathen hi eiho toh umkhom jing (Immanuel) ahi, hia kona kihe chen thei ahi tai.

Nehkholal (IL)

November 29, 2011

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>