Aishi Khomite dia MANA An

Aishi kho hi Chin State sah lama um ahin, kum 2010 chun akho sunguva gamsa dam lou khat ahung lha lut in, aki tha un, asa aneh u leh akho jang un adam mo un, ni kho chom kah sung in mi 9 jen athi un ahi.

A dam mo pat jou u ni khat, ni 2 pan in ahung ha dam mo cheh cheh un, achai nan thinan ahin lo khum un ahi. A chuti dam mop hat uvin khosunga adam dom hon adam lou ho chu Khampat Hospital lama apo suh un, hospital lhung man louva lam laiya lakah a, hinkho bei jong aum uve.

Hapta khat le ni sung in inko 20 vel sunga mi 9 jen in dammo na kon in hinkho beina chan ana pha un ahi. Ngaina dana ana kitahsan chu “khosunga gamsa lhai lut aki tha a, akineh leh khosung mi ten toset atoh kha jie” ti ahi. Amahon jong chutabang ma hi ding ana gel u ve.

Gamsa aneh jouuvin, kho sung mite khat in lamdang tah mang anei jin, amang in mikhat in “Idia ka Uichau na kithauva, na neh u ham” ti ahi. Kho sung mite chu hiche mang jeh chun aki cha den kit un ahi. Adammo nao chu gam a thilha ho dammo sah dan in agel un ahi.

Ahin adammo nao ajeh pen tah chu aki khol a ahi leh sakhi dam lou, gamlaha neh le chah ki hol jou lou, khosunga hung vah lut chu athauva, asa aneh jeh u ahi pen e. Sa dam lou aki neh leh kidam mo, kithi thei ahi.

Dam lou jeh in Khampat ahung lhung un, Khampat khopi sunga tahsan chate leh doctors hon ahe pi un, na sa tahin apan hu cheh un, ajen un ahi. Ahin dam mo na a sum le pai tampi bei ahin, alhing a pan hu jouna aum thei pon, aban aki jen un ahi.

Kum 2011 chun anah nah in lou alhouvun, chang a at un, ahin alou soh ga jouseu chu ajoh un adam mo laiuva aki jen nao sum ba ho asah u leh aneh diu aum kit ta pon ahi.

Khosung lamkai hon panhuna ahin thum un, tahsah leh lhagao va sopi khat ahi toh lhon in, aki lainat pin pan hu thei na lampi aki ngaiton ahi.

Nung jep chu Tamu Christian Church leh Khampat Christian Church a Pastors ho leh upa hon aga vil un, aneh diu an chang  pha chom pi aga ki hom in ahi. Khosung mite aki pah thei lheh un Pathen thangvah in um jing ta hen!

Hitabong toset hi mijousen kitoh lou chule jong koiman kipel thei lou ahi. A thupi pen a kigel chu “khat leh khat genthei toset teng kilainat pi ding” hi ahi. Genthei hahsat na to teng leh pawl (houbung) khentum nei louva koi ma jousen itoh cheh diuvin iki tem un ahi.

Pathen in khosung mite, apan hu ho chu le hiche thuso sim ho jouse phat thei boh ta hen!

Dr Nehkholal

 

1 comment to Aishi Khomite dia MANA An

  • Letkhohao

    ja umtah Lamkai ho keijong jatle nam ngailut na jal in,kei jong jat le nam khantou machal nadin kapan nathei chen in ka pan nom e,
    Tohgon nanei hou nin het sah g uvo….

    kaki pah-e
    Letkhohao

Leave a Reply to Letkhohao Cancel reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>