Zomi Congress for Democracy Khutsan a kon kihilna

Zomi Congress for Democracy hi Myanmar gamsunga Political Party khata khutsan ahi thu Sorkal Newspaper (The New Light of Myanmar) in August 18, 2012 nin ahin phong doh tai.

Hiche Party hi ademnom um kha leh tin July 27, 2012 ni chun Sorkal newspaper a ana so uve. A demnom hon hiche aso ni (July 27, 2012) a pat ni 7 sunga demtheina thu kicheh toh demthei ahi thu jong ana so uve. Demna um lou hin tin, tu ni August 18, 2012 nin khut san ahi thu ahin phong doh uve.
Hiche ZCD khut san ahi masang chun boi napha chom pi ana um e. Nam min “Zomi” hi Myanmar gamsunga jat le nam 135 sunga ajao poi tia Sorlak lama mopohna nei hon amin khel dia ana le don but u ahi.
ZCD lamkai hon adin piu chu ahi leh 1990 kilhen kuma jong chu “Zomi” mina din ana ki phal sa, tua iti dana phal mo hi ding ham ti ana hi. Chubana “Zomi” ti min hi jat (135) sunga ajao louvang in minam chu um lou ahi poi. Amin joh chu minchoma (Zo, Tedim chin, Tonzan chin ti ho) ki sun ahi atiuve.

Zomi um leh um lou thu boi jeh in Commission Committee hon jong chom kha akho ngaisah uve. Hiche pat sung in Myanmar gamsung hi hen, gam pam langa cheng “Zomi” min dei ho, adeha USA gamlang lhung hon amun amun a lhangsapna ahin nei un ahi. A chainan Sorkal lamkai hon “Zomi” mina party dinphal na ahin pe doh tau ve.

Tun Tamu langa jat le nam min in boina aum thu aki jan ahi. Myanmar gamsung jat simna (135) laha “Kuki” ti min akisun poi. “Khongsai” leh “Thadou” ti bou ahi tia lhangsam loi aum e. Chule ijat min u thu hi akhang khanga ana boi peh ahi.

Khongsai, Thadou, Kuki, Thadou-Kuki min thu hi Cultural Committee lamkai ho lamkaina, Chin State lamkai ho lamkaina leh Zomi Baptist Convention ho lamkainan akum kum in ana sei khom uve. Hiche thu ana ki seina mun ho chu Khumnoi, Nanpalong, Theijang, Phoilen, Hakhai kho ho ana hi.

Chin State Sorkal in ana thu lhuh peh u chu “Thadou Kuki Chin” ti ding ti ana hi. Ahin alang to Thadou leh Kuki dei hon hiche min Thadou Kuki Chin ti ding chu adet thei kit pouve. Kum le lha ahung sot sot in, ama um um in ana um gel in, gamsung Sorkal in jong Culture leh Literature thulam hi ana sei beh ta pouve.

Tu Sorkal thah hin mipi lung dei ho ahin khohsah kit un, adon a don a ama jat jat in kiloikhomna ahin ki bol cheh kit uve. Chin State lhang langa cheng Cho hon jong ama ho thu sim hi malai Pyu ho to kisamkai na thu khol ding tohgon ho jong Parliament a dohna ho anei uve.

A che sa kum 10 vel a kon in Myanmar gamsunga jong Kuki min dei ahung tam cheh cheh in ahi. Chule Malaysia lama United Nation a Refugee Status din mun nga na din jong Kuki min hi amang un ahi. Chule India lama pan sa khang dong hon jong Kuki min in pan alah un ahi.

Tua Malaysia, Australia, America, Korea leh gam chom choma cheng lut ho hi atam jo Kuki mina lut ngen ahiuve. Hiche laha a chun Thadou dei leh Khongsai dei jong tampi aum uve. Ahin ama ho chun hiche minte ni chu International level a pansah na kham ahi lou jeh chun Kuki min chu ana din pi cheh uve.

Tu khanga natoh na dinga gamsunga Kuki min hi jat 135 ajao pon Kuki min in ima ki bol thei pon te ti jong aum e. Tekah din, Zomi min jong 135 sunga apang pon, ahin gamsung hetin aum doh e. Kuki min a jong na toh thei, mihet a boldoh theina tampi aum e. Thadou min let sah nom, Khongsai min letsah nom, Kuki minletsah nom ti hi louva, tu lai khanga jao taha natoh thei na ding gel khoh angai ma ma e.

 

 

2 comments to Zomi Congress for Democracy Khutsan a kon kihilna

  • Hen Khongsai (Kuki)

    Myanmar gamsunga nam min chung changa dei le dei lou thu kisei hi adihpoi. Idei le ideilouva kingam dingin jong kagelpoi. India le Burma, Bangladesh gam thum British hunglut masang, jalena amu msang peh uva hiche nam min ana umsa chu Kuki ahi. Kuki hi koima chu pu ahipon, Nampi min ahijenge. Zomi kiti le adang dang min thah kisa ahin, vannoi het a nam min ahipoi. Zomi itile hiche gam thum sunga cheng ho ahoppon, khongsai, thadou iti jong leh ahopdehpoi. Amaho hi phungbah min ahiye. Tuchana hiche thu hechen thei lou ho hin iti Nampi na atoh tuoh thei diu hitam taoeh angaiyuve.

  • Ngamboi Haokip

    Eti dan a tuchan chan hitia eboi nah lai u ham…..Khah phat ahi tai thou un khang un emut phat ahi tai poi vai ahi tai……Thadou le Khongsai a bui phat ahi tapoi….kilung toh tah in tahchapa/tahchanu tin enam piu KUKI hi dopsang phat ahi tai…Hat in lang hang un.

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>