Thu Lhang Sam

THU LHANG SAM
2012 December-January-February 2013 Yangon

Hiche THU LHANG SAM sim jouse Pakai Jesu min in ngailut salam ka hin bol e! Tulai thilsoh umdol ho ani anin aki khel jing in, khang thusim ho hi het jing in aphan ahi.

A che sa khang sunga chu thil soh ho chu ol ol leh nom nom-a ana ki khel ahin, tulai khang hin hoi lai mun hi jong leh thilsoh ho gang tah in aki khel jeng tan, het dia lom i-het louva, bol dia lom i-bol lou leh da lhah ki hi hi kom ding ahi.

Mipi te ho het chet thei na pha chom pi jong aum e. Tu Sorkal thah hung ki khel a kon in, kihetmat theina jat chom chom i-gam sung uva man chah thei jin ahung um tan ahi.

Masang laiya chu telephone jong hi mi len mi lal, leh mihao ho bou vin ana nei u ahin, tu hin akho akho-a telephone mu thei leh man thei jin ahung um doh tan, gam chom leh mun chom-a um ho toh kin le dong thupi ho aum teng kihetmat to na aum thei tai.

Chule i-chennao Homalin, Tamu, Canaan leh Khampat kho pi mun ho a jong Internet man chah thei ahung hi tan, gam chom a um ho toh thu, lekha leh limho apet pet-a kithot thei na aum tan, kihet mat dan jong ahung ki khel tan ahi.

Hitia man chah thil ho ahung so doha, manchah thei ahung hi bang in, i-chen khomnao kho le veng sunga jong kihoi tup leh kiloikhom dan jong hi gel khoh angai tan ahi.

Khan kho thu lam ahin, houthu lam ahin, chule khantouna lam leh damtheina lama dinga het dia vat thu ho jong hi i-khol uva, i-kihil jing u angai lheh tai.

Burmese te paovin, “Pyet asin, Pyin Kha nah” ti pao chang aum e. Hiche hin asei nom chu “I-kisem phat nom lou leh sot tah ki mang thah-a, i-kisem phat nom leh chomcha” tina ahi.

Tu i-in cheh kho sah u leh ihin kho man dan u aki khol leh lung lhai aum jou ta pon ahi. Tahsa lam thu ahin, houlam thu ahin, kivaihom na lam thu ahin, i-pi lam thu hi jong leh kikhol phat ahi mong mong tan ahi.

Lung gel ngaito dan hin mihem hin kho apui ahin, i-lung gel ngaito dan chu aki phuh det lou leh i-hinkho ki suh jou lou ding ahi. Ajeh chu mi hem hi ama lung gel gel banga hinkho aman ahi.

Hinkho man dihna dinga lung gel dih angai jin, lung gel dih nei thei na ding chun dinmun dih nei angai je. Hichu Bible adeh in, Thuchih bu sunga aki mu doh thei je. Hiche THU LHANG SAM sim jouse, Pathen in phat thei na bohcheh tau hen!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

KHOPPI NOMTAH-A KI MANG KHOM

Kuki Christian Church of Myanmar hi kum 2004 kuma chu Tamu khopi a Christian Church ho leh houbung chomchom pha chompi pang khoma hung um doh ahi.

Kipat til lai chun KCCM houbung sung hop in Khoppi ho Joljam kho leh New Canaan kho mun ho a thupi tah in ana ki bol in ahi. Hiche kikhopna ho ana ki bol doh thei na chu muntina um tahsan chate ho pan hu na a kon ahi.

Kum 2010 apat hin KCCM gamsung houbung ho keo hi lou vin, pawl chom choma um jat le nam kibang, pao leh chon dan kibang jouse hop a Christain Khoppi bol ding ngaichat tah ahi toh lhon in, hiche kum 2010 a pan chun pawl det khen nei lou vin Khoppi (Convention) ahung ki mang khom e.

Kum 2010 kum, a (1) veina Khoppi a chun pawl chom chom a kon mipi hung kikhom chu mi 250 vel aphan ahi. USA gam a kon in palai mi ni: Chuck leh Mary te nupa ahung lha thei lhon e.

Kum 2011 kum, a (2) veina Khoppi a chun pawl chom chom a kon mipi hung kikhom chu mi 150 vel aphan ahi. A 1 vei na sanga a 2 vei na a mipi ahung lhom hi, mun le jang nei hon misim jat ei kah peh jeh u va hung lhom kha ahi. Hiche chung hin Chuck leh Mary te nupa ma ahung lha kit lhon e.

Kum 2012 kum, a (3) veina Khoppi a chun pawl chom chom a kon mipi hung kikhom chu mi 300 vel ahung pha kit e. Mun le jang nei ho henga ngehna ki neiya kon misim ei hin tam lhun sah u ahi.

Hiche chung a hi USA gama kon palai mi 5 hung kigong ahiuvin, Van leng-a (flight schedule) khol jin na phat le hung aki khel jeh in mi 3 ahung thei ta louvin Yangon a aum den un, mi ni bou Khoppi a ahung lha thei lhon e.

Pathen leh amite pan lah khom jeha Kuki Christian Khoppi hi 3 vei jen ki mang khom thei ahi bouve. Khoppi a hung lha ho jouse 1. Bus leh Motor cycle tou man ho alhing set in aki to peh in, 2. khopi sung in neh le chah neng jel in aki vah in, 3. um na ge na jong pha te chan aki gong in, 4. Khoppi kibol lo na Pathen Thu kihilna jong gil tah in aki nei jin, ahung ki khom mipi te jouse tahsa leh lhagao kipah leh tha nom in aki le cheh un ahi. ~~~~

Hilchet: Convention kiti pao chang hi kim khat in kiloikhomna (organization) min in amang in, hiche thuso a hi Khoppi (Fellowship) tia ki manga hi.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

A (3) VEILLHINNA KUKI CHRISTIAN CONVENTION

December 27-31, 2012 ni kho sung in a 3 vei na Kuki Christian Convention chu Tahan Theological College, Tahan, Kalay Myo, Sagaing Region, Myanmar mun a, ana ki bol in, Pathen mapui na jal in lo lhing tah in ana ki mang chai tan ahi.

Tu chung khopi a zin gun leh thuhil a pang hi United States of America gampana Chuck leh Mary Ann Cherry te nu pa ahi lhon e. America gama kona mi 5 (Chuck, Robin, Mary Ann, Missy, Laura), jen hung ahiuvin, Kalay Myo to Yangon Airline ki le ni ding nikho hi, aki le na diu ni kho hom ahi thei tah lou jeh in, Kalay Myo langa mi 3 ahung lha thei ta pouvin, Yangon a Hope Boarding Students ho toh nom tah in, phat amang u vin ahi.

Tu kum Kuki Christian Convention hung lha mi sim abon in 300 aphan ahi. Misim hi kitoh chet a sim toh ahah san, pi lhing min hin sun doh ho chu mi 281 aphan ahi. A kisim cheh thei louna ajeh chu chapang ho jong pha chom pi ahung pang un, chule khopi ki man sung in mi pi ahung be pha chom pi aum in ahi.

Hiche khopi a hung lha ho hi Township 6 a kon ahin, kho 18 a kon a hung ahiuve. Khopi a hung lha tahsan cha te ho hi houbung pawl chom chom a hung lha khom ahiuve. A hung lha houbung ho chu ahi le:
1. Kuki Christian Church-Myanmar (KCCM), 2. Kuki Chin Baptist Association (KCBA), 3. Thadou Baptist Association (TBA), 4. Roman Catholic (RC), 5. Assembly of God (AG), 6. United Pentecostal Church (UPC), 7. Presbyterian Church of Myanmar (PCM), 8. Salvation Army, ti ahi.

Tu chung thupi hi “Van-a Na lung chan aki bang in, kei ho chunga jong Na lung chan kim hen” ti ahi. Chuck leh Mary Ann in hiche thu lu pansan thusei na leh kihilna anei lhon in, apat a pan in achai chan in English paova pat in Kuki paovin pao ka len, mipi te ho aki pah thei lheh uve.

Pakai Taona tia Christian te hon i-sim jing u thu hi ki lho khon ahin, ni kho 2 sung in aki chai man pon ahi. Tu chunga ki hilna a ki mang chu thu lu 3 aum e. Hiche ho chu ahi le: 1. Na min ki ja hen, 2. Na Gam hung lhung hen ti leh 3. Na Lung chan kim hen ti thu lu thum ahi.

Chuck leh Mary Ann thuhil kichai jin mipi te ho thudohna phat aki hong in, hiche phat sung in jong mi pha bep in hatchet lou, het nom thu ho chu doh nom nom dohna ahiin nei uve.

Kum dang lha danga chu Khopi aki bol leh, mipi te ho thudoh na phat kipe ji louvin, hiche KCC-Convention (Khoppi) sung hin koi ma jouse hetlou dohnom dohna phat aki hong jing in, thudohna leh le-donbut na phat nom, phat man lu tah aki mang khom in, lung na chim chim aum lheh e. Kum kit a ding in ki gong san um cheh u te.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

THOHGENTHEI TOH HO KIPAN HU

Mr Myint Aung hi Burmese ho ahin Buddhist houna a hung sei len ahi. 1980 kum vel chun aji nu Ms Nyo Hlah leh asopi pa Mr Ye Tint toh achennao Yesakyo kho a kon in Bokkan (Zoumun) kho a ahung ki cho un ahi.

Ama ho hi khut them tah ahiuvin, chang tena tang, pucha, go dal, pheh, chang tun na bem leh lou lho ho dia man chah chom chom ho asah jiuva ki vah ahiuve. Tamu gamsung pum adeha lou na tong hon ama ho sah manchah ho akichoh jiu ahi.

Bokkan kho hi Mizo leh Burmese ho chen khomna ahin, ama ho, a hung lhung thah ahiu tohlhon in, Christian hon aki kho ton, pen pi sopi bang in ana ki bol in, chule Christian te Pathen houthudol jong ahin he un, ahung lhun jou u phat sot louvin, ama Myint Aung le haji nu Ms Nyo Hlah hin Buddhist hou da lhan Hing jing Pathen hou vin ahung ki khel lhon tai! Pathen min lou pi jing ta hen!

Kum pha chom pi hi Pathen houthah ahi jeh in, houbung sunga lamkai a apan louvang in, kipah tha nom tah in houbung sunga aki mang cha jing in ahi. Tahsan pi lhing ahung hi phat in Bokkan houbung upa (Chairman) din mun in ahung pang in ahi.

Vang set um tah ti ding ham, ama hi ol ol in ahung dammon, nat na len tahkhat ati chunga ahung soh doh in ahi. A khut jung a ahung ki pan in, ol ol in, akhut jung ho ahih in, chujouvin ol ol in amon in ahi. Hiche anat til lai chun Tamu gamsunga Phahnat na kizen na ana um nai pon ahi.

Kho nung peh hin Medical Department a kon in phahnat na (Leprosy) nei ho ahung hol un, phah nat na lou ahung peu vin ahi. Hiche apeh u phahnat damna lou chu aneh ding dan ahil vang un, ban joma vet suina aum lou jeh in, alou neh ding dan jong English paova kisun ahin, asim thei lou jeh in, alou chu ane khel in ahi. Hiche alou aneh khel a kon in, atah sa ahin tong kha kit e. A mit tha jung ahin kai jin, chule akeng tha gui jong ahung chom doh in ahi.

Masanga chu go le ting ho ama tah in akisat a, ama tah in akhut mang chaa, pu cha, chang tena tang, pucha, go dal, pheh, chang tun na bem ho ana kisah ahi. A khut jung ho ol ol a ahung bei phat in, go jong sat thei ta lou, ima jong bol thei ta lou, mihem mit mua ahing lem lem a hinkho aman doh ahi tai.

Tun aji nu leh kum 80 val leng apa neo pa toh Bokkan kho muna acheng un ahi. Mihem lama vet ding chun ama leh apa neo hi aji nu Ms Nyo Lhah in apum vah dan ahi tai. Aji nu jong hi lung gim leh neh lechah hol akop jeh in avei se doh tan, na jong pha te chan atong jou kit ta poi.

A chen nao in jong chu lhong um lou, abang um lou, achung jong bi ki khu bit lou, chuh lai leh go va va jeng ahi. Kum 2012 chun America a cheng ka ki hetpi ho khat in, in sah na dia avat thil choh na kham ahin pan hu in ahi.

In sah man ding avat jeh in Zoumun kho sunga Mizo Youth ho henga pan pi na ka thum uvin, ama hon jong ngailut jal in, in asah peh un ahi.

A 3 vei lhinna Kuki Christian Convention khopi a jong aji nu tah ahung lhan, Kuki pao ahet lou vang in khoppi kipat nia pan in, akichai gei pon tho tah in apang lhum kei jin ahi. Chukeo hi louvin, Khoppi sunga jong sa khi pan na anei jin, Pathen vahchoi la jong asa e.
Sai khi apan na a “Ka loi pa dam mona hi mihem lama kon a thoh hahsa tah ahi. Khat vei vei leh Christian hi na jong ka nung sun deh kha ji lhon e. Ahin Pathen hin ei nung sun lhon pon, ei um pi jing lhon e” ati ahi.

Khoppi a hung lha hon jong nei man hi louvin, Pathen min jal leh ngailut na jal in sum pi toh khom na aki nei khom in ahi. Ki lam dang tah in Pathen in mipi te ho lung sunga achoh thouvin, sum le pai aki sep khom chu Ks. 114,400/, Rs 40 leh sang khol 1 aphan ahi. Pathen loupi na chang jing ta hen!

Hiche sum chu Mr Myint Aung, aji nu leh apa neo a dia ki dong doh ahin, Bokkan houbung upa ho toh ama ho dia avat pen aki gel khom in, chang choh peh ding in, kithu kim na aki nei je.

Hiche sum chu Bokkan houbung upa ho aki pen, houbung upa hon ama ho thum in, kum khat sunga aneh khop diu chang hum tang (30) achoh peh un, ain chen alhoh lut peh un, akoi tup peh uve.

Pathen min jala, sum le pai nei sun sun hin tohdoh ho, chang chohna a pan la houbung upa ho jouse leh ama ho insung mite chunga kum lhung in chamna, lungmonna leh kingailutna um jing ta hen.

Kum lhung a aneh diu an chang aki choh peh vang in, dam mo vei se, ki jen jing ngai ahin, muntina um tahsan cha te hon jong Pathen jana leh ama ho ngailutjal a sum leh pai hi hin, lou le ai hi hen, sil leh chen hi jong leh apan hu nom chan in pan hu thei leu hen kipa um lheh in te. Na bon chauvin Pathen in phat thei na boh jing tau hen!
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
CHE LE NA THEI KI SEM PEH

Vanoi ya mijouse aki bang pon ahi. A kim khat chu tahsa ti bah ki kimsel in apeng in, kim khat ma chu vitamin chom chom lhahsam jeh, lou le ai a ki jen khel jeh leh thuchom chom jeh in tibah akim jou poi.

Ti bah kikim sel a hung peng ho ngel jong chu apen nung ahi lou leh alet nung in jong dammo vei set jeh leh toset to jeh ho hin tibah aki suh mo jong tam pi aum e.

I chen nao kho sung leh houbung sunga achunga hung kisei din mun chang aum khah jong leh khosung mite leh houbung mite hon jat le nam, pawl chom ti khen louva i-pan hu thei chan uva pan hu khom cheh ding ahi.

Kum 2007 kum a pan in i-jat i-nam sunguva vang set na ti ding ham a, pha te cha lam jot jou lou ho leh tehse, chule meithai pha chom pi hi lha seh in an chang choh na ding in pan hu na ahung kipe jing in, mitam pin aphat chom pi lheh uve.

Lha seh a pan hu na aki peh ban a, ama ho dinga vat leh kisam ho aki gel peh in, hi thei chan in Christa ngailut na bul phu in aki pan hu jing e.

Tu chung hin ki gong doh be chu ahi leh khut jung tha hata, lam jot jou lou ho ding in kitolna leng (wheel chair) aki sem peh e.
Toupum a kitol na leng ho hi company hon tampi asem uvin, hospital dunga jong tampi mu thei in aum nai. Ahin ama ho sem ho chu kho pi sung dung leh lampi nom taha kisem na mun ho a ding apha nai. Ei ho chen na kho dung leh lam pi dunga man thei ahi pon, ahung ki ngaito chun lung gim ana um lheh e.

Mi dang ho sem dan ho phat sot tah pi ana ki khol len, ana ki dong len, chujouvin Tamu khopi a khat ana ki sem doh in ahi. Hiche ana ki sem chu asem pan jong aphat tin a ana sem hi lou, alung sunga ama cham a angaitoa ana sem ahin, ki tol thei na chan in ahin sem doh in, tun hiche chu Khampat a Mr Thang Kho Hang (Hang Boi) aki pen, aman jong amang cha pan tan ahi.

Hiche ana kisem na a avat jep chu ahi leh kitolna chu ana len val jep in, jang khai tah aman chah thei ahi jep pon ahi. Hiche leng ana kisem man chu Ks. 250,000/- jen ana lut e.

Ani chan na ding hi ana ki ngaito kit in, Canaan khoa mi khat in asem thei je ti thu aki jan, ana ki dong lhi len, ana ki mu ton, khat ana ki sem sah e. Ama sa sanga neo jep in aki bol sah in, tun a kibol chai tan, Twidimjang kho a cheng Miss Pha Hat ding in aki gong in ahi.
Hiche hi Miss Pha Hat ding in atou na leh akhut tuh na aki gam lat jep kit in, hiche hi Canaan khoa Mr Pao Kho Hang peh-a Pha Hat ding chu athah vai lhah kit ding in aki gong in ahi.

Hiche kitol le na thei ahung kisem lo na pen ajeh ho chu ahi le 1. Christa jal a khat le khat ki lai nat to pi jeh, 2. Jat le nam khat hi na jala ki kho tona, leh 3. Genthei hesoh hinkho ki do na ding ti ho ahi.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

IN LEH NEI LE GOU MEI YIN KA MANG HEL

Vangset um tah in January 26, 2013; 1:30 pm chun Khumnoi khoa cheng Nu Neng Nei Lhing in le anei agou jouse mei jin aka vam hel jeng e. Amah in kum 2012 leh 2013 sung hin mihem khat din muna thoh jou hoi hi lou hel pul douna leh thohgen thei chom chom tam pi ana toh e.

Nu Neng Nei Lhing leh a jipa Pa Pum Za Pao in Pathen a kon in gou; cha nu kum 5 leng Miss Neng Hoi Kim, chapa kum 1 leh lha 6 leng Mr Thang Kho Gin Mang anei lhon e. Tun Nu Neng Nei Lhin hin nao avop in lha 7 apha tan ahi.

Pa Pum Za Pao hi dam mo jeh hospital mun chom chom a, phat sot pi ana ki jen in, sum le pai tam pi jong ana bei jin ahi. Ahin insung mite leh aman dam ding angai chat vang un, December 23, 2012 chun alei hin kho ana bei tai.
A cha nu lhon Miss Neng hoi Kim ma hi March 2012 lai chun ana ha dam mon ahi.

Chule achapalhon Mr Thang Kho Gin Mang jong chu tuisan aka kit in, chujouvin achapa hi khosung mi khat in Bicycle a apoh na-a a khe lhan, January 23, 2013 ni chun a- khut a-kisuh boh kit e.

Vang set na lot lot in, a chai na kheh in, asi lei ya a-kon kah in, a-in nei pu toh kum sot tah-a ahin lam doh lhon, in leh nei le gou jouse leh kum lhunga aki vah nadiuva lhing set chang jouse chu January 26 2013 ni, sun pung 1:30 pm chun MEI yin minute 30 kah in ana ka mang hel tai!

Pul dou lai taha, chanu dam mo, chapa tuisan ka, chapa akhut bong na lai, chule achen na le ge na in, meiyin ka lha ta, aneh ding chang josue mei jin ka vam hel ta, iti hin kho aman diu hi tam? Tao peh a gang taha pan hu ngai ahi tauve.

January 31, 2013 nin Nu Neng Nei Lhing, houbung lamkai Pa Chal Ja Pao leh khosung haosa pu Pa Jam Sei toh KCCM Office a ahung un, pan lah khoma pan hu thei na lampi ngaito khom in ahi.

Aban in tu hapta sung in KCCM lhacha Saya Then Kho Mang leh Saya Lhun Ja Ngam chu Khumnoi kho a aga che lhon in, Father Ngul Mang leh lamkai ho toh kimutona anei juvin, pan lah khom ding dan leh thing leh man chah choh ding dan ho asei khom uve. Gang tah a achen na in diu sah doh peh ding ngai to ahi.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
KCCM OFFICE KISA CHAI TA

Kuki Christian Church of Myanmar hi kum 2004 kum a hung kipan ahin, tun Pathen mapui na jal leh lhacha ho leh upa ho lamkai na jal in houbung 18 aki pha tan ahi.

Sum le pai hahsat jeh in kiloi khomna KCCM office in ding jong ana ki sad oh jou poi. Local houbung ho aki khohsah in, local houbung ho a kon in, hunam in ima aki la pon ahi.

Natoh na tham chule kivai hom na jouse a local houbung ho thaneina, vaihomna leh natohna chunga ki ngam ahi. Denomination din mun chu ahi le kiloikhomna Offie lam thaneina aman uva, local ho chunga vai ahom u ahi. KCCM kilamkai dan hi Local church ho pi lhinsah a, local church hon atoh jou kham kham uva pan alah cheh diu ti ahi.

Local houbung ho leh mimal a jo kham a kipehna ana ki bol in, atam jon ahin pe lhing un kipa aum lhehe. Houbung leh michang mina kipehna ho anoiya bang ahi.
1. Khampat Christian Church 120,000
2. Tamu Christian Church 100,000
3. Kanan Christian Church 50,000
4. Namihan Christian Church 50,000
5. Bokkan Chirstian Church 50,000
6. N. Valpabung Christian Church 50,000
7. Joljam Christian Church 50,000
8. Homalin Christian Church 40,000
9. S. Valpabung Christian Church 30,000
10. Shwepyita Christian Church 30,000
11. Tongkyaw Christian Church 20,000
12. Jangnoi Christian Church 15,000
13. Tingkaya Chirstian Church 10,000
14. Jonglon Christian Church 10,000
15. Voksu Christian Church 5,000
Houbung ho kipehna agom a 630,000

Mi mal a kipeh na ho anoiya bang ahi:
1. Gl Tha Thang 10,000
2. Saya Lhun Ja Ngam 10,000
3. Pastor Dou Ja Sei 10,000
4. Pstor Ot Kho Let 10,000
5. Saya Jang Sei 10,000
6. Pastor Jang Kho Kam 5,000
7. Rev Ngam Hao 5,000
8. Saya Then Kho Mang 5,000
9. Upa Jil Mang 5,000
10. Upa Hol Mang 5,000
Mi mal agom a kipehna 75,000

Cement a ki pe ho:
1. Rev Lun Kho Thang cement dip 1
2. Mr Solomon cement dip 1

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Hiche THU LHANG SAM simnom hon anoiya banga muthei/simthei ahi.