Doitup Kicheh Neingai

Tahsa lamthua kiloikhomna leh lhagao lamthua kiloikhomna hoa doi le tup kicheh tah nei angai je. Kiloikhomna a pang jousen hiche adoitup u chu ipi pen ham ti kichen tah a ahetchet cheh diu athupin ahi. Doitup hi kam changa sei keu hi louva, lekha changa chomkim theipen a sut doh tei tei ding ahi.

Mitam pin tahsa leh lhagao lama pankhomna ding in kiloikhomna asem uvin, ahin Doitup kicheh taha simtheiya sutdoh ahi lou jeh in, kiloikhomna asem til u chun mitampi atha nom un, apang khom cheh uve.

Ahin alung sung cheh uva adoitup u chu khat kal va, doitup chom chom ana hi kha ji e. Chutia doitup chomchom ahung hi chu ahung kihet doh cheh cheh teng leh kiloikhomna chu hung boi cheh cheh ahi.

Doitup kicheh lou jeh leh hetdan kibah lou jeh in, kiloikhomna ahung boi kei hi louvin, khat le khat kikaha kimuthadana, kitahsanlelna, kikopnomlouna leh kitomona chom chom ahung soh doh ji e.

Loi le gol toh kingailutaha ana uma, kiloikhomna khat hung kisemna a pang khoma, doitup hetchet lou jeha kitomona ahung so sanga hiche kiloikhona chu bolda pha jo ahi.

Vannoi leiset a gamlen ahin, gamneo ahin, chule houthulama kiloikhomna ahin, sumkolveina lama kiloikhomna ahin, themzilna lama kiloikhomna ahin chule kiloikhomna chom chom ho ahung boinao pi pen u chu “Doitup kicheha hetchen lou jeh leh adoitupuva kona thilchombeh atohkhah ji jeh u” ahi ji e .

Hijeha chu tua na kiloikhomna (organization) chun “Ipi adoitup ham?” ti hi lamkai hon kichehtaha hetkhoma chule mipite hon kichehtaha ahetthemna diuva kama hilcheta chule lekha a jong phate cha a sut doh ding ahi.

Kiloikhomna khat isem masanga tohding chu ahi leh kiloikhomna avat je dan ho chu lung gila gel khen ding, kam a seiphong ding, chule lekhaa sutdohding ahi. Mipin kiloikhomna avat je dan kichehtah a ahin het teng leh kiloikhomna sem pan ding ahi.

Ijemtia tunia i-kiloikhomnao aboi leh, i-doitup u chu agang thei pen na seikhoma, kichehtaha phondohna um thei leh, i-kiloikhomnao chu machal in tin, lam jang ding ahi.

Akhum kha naa sei din, kiloikhomna i-sem ding teng u leh DOITUP ho chu kicheh taha sut doh masat ding ahi. Kiloikhomna neisa i-hiu leh hiche i-kiloikhomnao doitup ho chu tupjing utin, chepi jing leu hen boina a i-kipel doh diu, lo lhina i-chan diu ahi.