Pastor Natoh: In Sung leh Houbung Sung

Thumakai.

“Pathen Lhacha a pang Pastor hon Insung leh Houbung sung hoijoh akhohsah ngai yem?” ti hi thupi tah khat ahi. Hoi joh i-khohsah diu ham, gel khom’u te.

Akhang dungjuiya geldan

Mi kon khat chun “Pastor hon insung sanga Houbung sung akhohsah joh ding ahi” tin tin, kon khat chun “Houbung sung sanga Insung akhohsah ding ahi” ti jong um ding ahi.

Achesa kum 20, 30 vel lai chun Pastor hon gamsung’a houbung ho akhol jiuvin, Pakai Jesu kipana thupha ana lhangsam jiuve. A kho akhoa tahsan chate hochu Pathen thu ahil un, mite ho atil khou un, Pathen in jong amang cha un, akho akho leh ahoubung ahoubunga Lhagao lama kipana leh halna ana um jing e.

Hiche khang laiya Pastor ho jong chun Pakai mina, in le lou da lha-a, ji le chate dalha-a kalson ngam chu Lhagao lam thudol khohsa joh, Pathen lungdei lam tongjo in ana gelun ahi.

Chuma bang chun tahsan chate hon jong Pastor ho ahung khol jin diu chu angah lel jingun, Pastor hon avil teng u, akipah un, ahung vil jing diuvin jong atem jiuvin ahi.

Mipin ten Pastor hon aphat tina gam akholuva, avil jing diu angai chat u chu apha nan, hiche mipi ngaichatna chu Pastor hon abulhit diu ahi leh ‘Pastor ho chu aji achateu toh phat tina kikhen jing ding’ tina toh kibang ahi tai.

Pastor in jong insung natoh sanga Pathen natoh gel khoh jo-a, Kalson hi Pathen lungdei lam hi dia nasatah a ana tahsan u ahin, mipi te hon jong Pastor ho insung neh le chah hahsat leh kitup le kitup lou gel sang in, in sung mite da lha-a, kalsong ho chu nasa tah in apah cha kit un ahi.

Korea gama Pastor ho kihilna khat-a thuhilpa khat in Pastor ho henga, “Pastor hon insung leh houbung sung hoi joh khohsah ding ham?” tin adong e. Pastor hon adonbut naova, “Pastor ho hi Pathen natong dia kikah doh ahi tah jeh in, insung sanga houbung natoh khohsah ding ahi” ati cheh un ahi.

Thuhilpan ahilchetna a, “Sunday ni Pathen Thu nasei masang in, insung na jinu toh kiphun in, Pathen Thu sei le chun, itin tem?” tin adong kit in, Pastor ho lung gel achou in ahi. Hia kon chun Pastor hon hoijoh khohsah masat ding ti ahin gel doh uve.

Bible a kon mudoh dan

hon insung leh houbung sung natoh iti khohsah ding ti hi Bible a Pathen Lhacha a pang Eli leh Samuel te ni insung thu a kona kon a kihil thei ahiye.
Eli hi Pathen Lhacha kitah tah ahi. Pathen leh Amite kinho lolhing sel in ana tong e. Eli hin achapa te ni (Hophni leh Phinehas) phate cha ana khou khah jou lou jeh in, achunguva Pathen lung hanna, ana chu khan ahi (1 Samuel 2:22, 29).

Eli banga Samuel jong hin Pathen leh Amite dia kitah tah na, anatoh ahi. Achapa te ni (Joel leh Abijah) chu Samuel khel in Beersheba khoa thutan in apang lhon e. Ahin achapa te nin thudih-a, vai apoh lhon lou jeh in Pathen lung hanna, achung lhona, ana chu khan ahi (1 Samuel 8:3).

Gospel la kisem ho i-sahuva kona hi, lan asei nom ho kal val’a adoi tup i-kile beu hi ding ham tia jong gel thei ahi. Tekahna-a sei ding in, “Mol le lhangsang jong leh cheding ka hi” ati Gospel la hi i-dei un, i-sa jing un, i-lung sunga Pathen natohnom na asou doh sah jin, apha lheh e. Ahin lam khat-a, “‘In sung khohsah louva, Pathen mina kalson jeng ding ahi’ tia i-ki le khel u hi ding ham” tia jong gel thei ahi.

Thukhumna

Achunga hung kisei ma bang in Pastor tampin insung sanga houbung sung natoh khohsah ding ti ahi. Ahin insung semtup louva houbung sung semtup ding ti jong hi adih jep pon ahi. Pastor hon aji leh chate a dia phat tampi peh ding, chubana midang (houbung sung) dia phat jong peh ding ahi. Mipi ten jong Pastor ho aji leh achateu toh phate cha phat aman khom theina diuva lung gel peh them angaiye.

Dr Nehkholal
February 11, 2015

Hilchet:

Hiche lekha kisun hi ji leh chanei Pastor ho thua kisei ahije.

1 comment to Pastor Natoh: In Sung leh Houbung Sung

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>