Hope Boarding School

HOPE BOARDING SCHOOL
No. 175 Aungdipa Street,
Ward (28), North Dagon,
Yangon, Myanmar
Phone 095411622
Email: [email protected]

THUPATNA

Hope Boarding School hi khocha a cheng genthei hahsa themjilnom ho dinga hung kipan doh ahi. Chapang khangdong ho semdoh tei ding tohgon a kona hung kipan ahi. Hitabong a chapang khangdong themjil be theina ding lam tohdoh theina chunga Pathen thang vah in um jing ta hen!

Tukum 2010-2011 themjil kum a hi Layshi, Homalin, Tamu leh Khampat gamkai ho a kon themjil chapang (24) toh kipan ahi. Ama ho cheng tahsa leh lhagao lam a khantou theina dinga lamhila mapui ding hi Pathen lungdei ahi.

Hiche Hope Boarding School hi Pathen ma pui na jal a ama chal jing ding tahsan aum in ahi. Mai lam teng leh Government hetpeh Christian Private School phatah khat ahung so doh thei na ding tohgon aki nei jin ahi.

Christian khangdong adeh a Kuki chate ho themjilna lam leh chihna pilna lam a khantou ding dei masah pen ahi. Leiset chihna pilna jilna keu hi louva lhagaolam leh chonchan pha jilna mun khat jong ahi. Koi tabong mailam a khang dong ho themjilna khohsa a panpi nom hon taona leh sum le paiya pan i-lah thei cheh u ahi.

BOARDING MIN

Hiche chapang khangdong ho themjil na mun min hi “Hope Boarding School” kiti ding ahi.

BOARDING UMNA MUN

Hope Boarding School mun hi No. 175 Aungdipa Street, Ward (28), North Dagon, Yangon, Myanmar mun a um ahi. Hiche mun jot na lam pi chom chom a um e.

1. Sule Pagoda pan na hung ding leh Dagon University lam jon Bus na tou ding, hia kon a chu Madalay bus stop a kum ding chua kona Bus 31 (a eng: yellow) tou kit ding, Laypyihwin bus stop a kum ding hia kon a ni vei jen veilam jot ding, in ning a kona a in 3 na chu ahi tai.

2. Junction 8 maiya bus stop pan bus 36 ahilouleh Parami 174 North Dagon lam jon tou ding, Madalay bus stop a kum ding chua kona Bus 31 (a eng: yellow) tou kit ding, Laypyihwin bus stop a kum ding hia kon a ni vei jen veilam jot ding, in ning a kona a in 3 na chu ahi tai.

BOARDING INPI DINMUN

Hope Boarding School ding Inpi hi Pathen phatthei bohna jal’in February 5-8, 2010 nikhon ana ki choh doh in ahi. Cheh denni a kisong, sahsa in lentah khat aum in ahi. Chule themjil ho akisil na diu twi gallon 800 val ket twibem len-tah akibol be in ahi. Tun hiche ho jouse chu akisem chaitan themjil khang dong hona mang pan tauvin ahi.

NEH LE CHAH

Hope Boarding School a themjil khangdong ho hi nikhat in an 3 vei aki vah in ahi. Jing kah an, sun an leh nilhah an ahi. Chule ama ho dam theina ding khohsah na jal in aphatin in twi theng bou akidonsah jing in ahi. Neh le chah hi mihem khat dia vat Vitamins toh kitoh a kivah ding ahi. Neh le chah hi theng sel a ki hon a ki vah jing ding ahi.

TAHSA THENNA

Themjil khangdong ho hi tahsa tipum pi theng jinga um sah ding ahi. Tahsa chung then leh thenlou hi mopohna nei hon aphat seh a ki khol jing ahi. Sil le chen von ho jong kisop theng jing ding ahi. Kang kal, ponpha leh ponsil ho hapta khat a (1) vei sop tei ding ahi. Tahsa chung ki-ah von ho chu ani seh banga asop theng jing diu ahi.

­­­­­­

LHAGAO LAM

Themjil khangdong hon aneo va pata Asempau agel doh uva ahinkho lhumkei juva Pathen ging a ching theitah a, hinkho aman thei na diu va kitil khou jing diu ahi. Bible hi Kuki, Burmese leh English pao ho a ki sim pi jing diu ahi. Ni khat leh taokhom na khat vei um jing ding. Sunday ni seh leh Yangon Christian Church a houkhom na aki nei pi jing uve.

SUM LEH PAI DINMUN

Hope Boarding School hi tahsan na jal a Pathen songa kipan ahi. Sum leh pai lam hi themjil a hung school chapang insung mite a kon ahi. Themjil khangdong khat in themjil sunga bei jat sum hi lhaseh ahi lou leh kum lhun teng leh alhing sel a apeh lut ding ahi. Ijemtia kum lhun a apeh lut jou lou leh kho vei a school aban jop thei leh thei lou thu a insung mite toh kithah hou kit ding ahi.

SCHOOL CHAPANG KHUT SAN DAN

Themjil khangdong ho hi a insung thusim umdol khol theichan kikhol a, chapang ho tah thutam pi kidong (personal interview) a, chu jouva sum leh pai abei ding jat kin alah jou diu hi nam ti kikhola ki khut san ahi.

THEMJIL SAH DING DAN

Themjil ding dan hi tuta dia Government School a kai cheh diu ahi. In mun a jong lekha ki hil diu ahi. Chuleh Saturday leh Sunday nikho teng leh Bible, Computer, Kuki pao leh English pao phate cha simthei, sei thei leh jih thei na dia kihil na nei peh ding ahi.

NATNA SATNA

Themjil khangdong ho natna sat na toh aum leh louthem ho heng a pui pai ding jen pai ding ahi. Ijemtia hospital kai angai leh kai paiya jendam ding ahi. Themjil khat adamo sunga mi dang ho toh ahi thei chan a um khom sah lou ding ahi. Lou kijen na a bei jat chu a insung miten ahin leh sah diu ahi.

AN HON DING

Boarding a themjil hon lekha phate cha aphat seh asim thei na diuvin an hon ding in Mr. Pao Tin Thang leh aloi nu Nu Nem Siam aki kom in ahi.

LUP-NA GE-NA

Themjil ho hi lekha sim leh tahsa dam theina ding khohsah nan mi khat jal khun khat, kangkal khat, lukhop khat, ponpha leh ponsil chomcheh, touna khat, dokhang khat, vonkoina ding thihkong khat cheh a ki gon peh in ahi.

INSUNG MITE TOH KIHET-TONA

Themjil ho hi lhakhat leh 1 vei tei a insung mite hon telephone ham ahilou leh lekha a kihetto na ahin bol jing diu ahi.

LEKHA BU HO KICHO TA!

Tu kum sunga Themjil khangdong 24 hon aman diu lekha sutna bu, pen, leh pencil ho alhing set in May 18, 2010 nin aki cho kim tan ahi.

THEM JIL HO JUI DING DAN

Themjil khat cheh leh ainsung miten Hope Boarding in aphat seha asem dan ho ajui cheh diu ahi.

+++++++++++++++++++++++++

Pakai gin kiti hi chihna bul pi ahi. Thuchih 1:7

Saya Nehkholal