America (Northwest) Lam Khol Jinna

Vaikon dohna

September 20, 2009 nin Springfield (Illinois State) khopi a kon in Chuck toh jing kah lam pung 6:50 am in Vanleng in ka leng doh lhon e. Springfield Airport a kona Minute 35 vel ka len jou un Chicago (O’Hare International Airport) khopi ka lhung uve.

Chicago a pan in Vanleng in ka leng kit un, San Deigo Airport ka lhung uve. San Deigo khopi mun hi Mexico gam toh kimat State ahi tai. San Deigo apat in 1:25 pm in Vanleng in ka leng kit un, nilhah lam in Portland, Oregon State ka lhung uve.

Portland (Oregon State) a ki ngahna

Portland Airport ka lhun lhun lhon in, Airport mun khata  ka ki nga lhon e. Ken ka von lhon ka ngah in, Chuck in car (a san) khat aga kom e. Hiche car hi Northwest States ka khol sung lhon a man dia ka kom lhon ahi. Car ka kom jou lhon in, ka von lhon ka hin khang doh lhon in, kavon lhon chu car khat adim set e.

Pathen thuseiya ki che ahi jeh in, na tohna lim ho vetsahna dia white board peh ka poh lhon ahi. Hiche sunga chu lim chom chom ho leh lekha kisun chom chom ho tahsa ka poh lhon ahi. Hiche chu atomna toh ki tom tha ahin, Airport a na tong hon atomna chu abot eh kha un, kan thei kan mon ka kan bit nah nah lhon e.

Holiday Inn (Hotel) ah ka jing lhun lhon e. Hotel a ka thil lhon leh ka von lhon ka koi jou lhon in, Portland khopi sung ka ga khol lhon e. Chuck toh ka lung lut na pen lhon chu Lekha bu lui ho johna a lekha bu ga vet hi ahi. Khopi sunga lekha bu lui kijohna mun ka hol pai lhon e.

Powell’s Books Store

Portland Khopi sunga Powell’s Books Store hi Vanoiya lekhabu lui kim na pen tin asei min thang uve. Hiche mun ka gache lhon chun adan adana lekha bu lui ngen aki se dim set e. A den aden achu thulu chom chom a ki khena ki joh ahi.

Hiche Powell’s Books Store a chu lekha bu lui ka vet le le leh, Burma gamthusim lui “History of Burma” ki ti khat ka mu doh e. Hiche lekha bu hi masanga Burma te thusim lui, Burmese pao luia ana ki sun chu English paova ana le doh u ahi. Hiche lekha bu a (1) vein a chu 1883 kum a, London a, ana ki so ahin chule a (2) veina hi 1998 kuma Bangkok (Thailand gam) a ana ki so doh ahi.

Hiche sunga hi masanga Burma leng te thusim ho jong aki sun e. Hiche lekha bu anung langa abelap nao (appendix no 2) khata chun Tagaung khanga leng ana chang India langa kona Burma sunga hung lut “Thadou” leng ho min chu aki sun doh e. Leng min 17 aphan, hiche hi konkhat in tulaiya Thadou ho chu ihiu ve tin pansat nan anei uve.

Powell’s Books Store chu nilhah kho jin kon thima ka lhun lhon ahin, gang chel in ka vah le lhon in, chujou vin ka jin lhunna lhon Holiday Inn (Hotel) chu ka lhung lhon e. Hotel leh Book Store kah car in minute 40 vel aki jot e. Agam lat sang in Portland khopi hi khopi len loi ahi tah jeh in, ni lhah lam in natong natham ki le atam in, lamlen gari adim den in, hijeha chu ka sot lhon ahije.

Hotel nom tah ahin, aman jong atam lheh e. Ka lhun na lhon indan sunga kisil na dan sunga meivah akisuh mo jeh in jinlhun man $ 20 ei kem peh lhon e. Breakfast neh man hi mi khata $ 20 ki pe ahi.

Portland (OR) pan Bremeton (WA) hinjotna

September 21, 2009 nin, Holiday Inn a jing an (breakfast) ka neh jou lhon in, ka pot lhon ka ki got lhon in, Portland khopi a kon in Bremerton khopi (Washington State) lam ka hin jon lhon e. Hiche gam lang hi mol le lhang, leh vakom ngen ahin, gari lam ho chu nom tah in aki bol in, lam jang, lamkai pha te chan aki sem e.

Gari lam ho jong chu gari ni kipel theina te bou ahin, lampi laia kikhenna hetna lou kang ho anuve. Chule lamkai mun jouse vakom lang leng lhah khah lou nadin, thih peh in bang atung un ahi. Mun kim khat ho a Cement khom ho jong atung uve.

St Helen Muna ki ngahpana

Portland khopi a kona phachom pi ka hin jot jou lhon in, St Helen mol ka ve pa lhon e. St Helen mun hi May 18, 1980 kum a chu tuimei (Volcano) ana poh keha, moll hang pumpi leh mile 57 kimvel chu asuh khah ahi. Tuimei yin mol ahin tum keh a chun, tuimei chu van chung langa leng touva, song hel, leiset ho chu apoh touva, mile 57 kimvel chunga chu hung le chuh ahi.

Hiche Helen mol tuimeiyin akah lai taha ana lah u limso (DVD) chu avetsahna muna ka ve un, minute 13 vel asot e. Hiche moltuimei ahung so ding hi, gamsunga miching hon akivel a cheng ho ana ma hetsah uva, kon khat chu ana tol doh u ahi. Kon khat vang chun ahi leh hiche mol lhanga ki chenga, ima tipon te tin aki chon nom pouve. Ama ho chu ajam doh man ta opuvin, hiche muna chun athi den tauve.

Tribal Museum a kingahpana

St Helen mun a kon in ka hung doh kit lhon in, pung pha chom pi ka jot jou lhon in, Tribal Museum muna ka lut pa kit lhon e. Hiche mun hi Red Indian pu le pa te ho ana kho sah nao mun ahi. Ama ho chu nga mat na lama ana them ma ma ahiuve. Nga a ki vah te ana hiuve.

Hiche kimvela cheng ho chu tununga ahung khan tou phat un, masanga ahin kho man dan u tulai khang thah ho leh mite hon ahet theina diuva “hetjingna in” asah u ahi.

Hiche Hetjingna In sunga chun apu apa te hou tuichunga ana kitol dan hou, kong jat chom chom ana sui ho, chule nga mat na pom, ngamatna thal, nga koi chom chom ho jong avet sah u. Chubana hiche kimvel vadung leh tuikol sunga um nga jat chom chom ho lim jong avet sah uve.

Mission Lamkai dang ho toh kimutona

Tribal Museum a kon in ka hung doh kit lhon in, Bremeton (Washington State) damsel in ka hung lhung lhon e. Mission chom choma loi le gol dang ho toh Central Kitsap Christian Church a ka kimu touve.

Nilha ka ki muto jou un, houbung lamkai Larry & Charlene Rodgers ina ka ga lhung lhon e. Jan in pam langa akoi u khol jin na a kitol thei (Bus in) Mobile House a ka geh lhon e. Hiche Mobile House kiti Bus sunga jong hi kisilna, an honna, iya kai alhing seta ki koi ahi. Khol ajin teng u leh car nunga hiche Bus In hi akai uva, age na nom mun uva chu geh aji ahiuve.

Missionary Meeting

September 22, 2009 nin Central Kitsap Christian Church muna Northwest School of Mission (NSM) mina kiloikhom houbung ho vil dia kisu khom missionary chom chom hon kimutona kanei uve.

Hiche kimutona a lamkai ho chu Northwest School of Mission ho ahiuve. Hiche Northwest School of Mission hi America gam northwest lama um Christian Church leh Church of Christ houbung ho kiloikhomna ahi.

Kum seh leh ama ho hin Vannoi gamtina missionary chom chom atep jiuva, hiche ama ho kiloikhomna a pang houbung ho henga hi mission natoh dan alhang sap sah jiu ahi.

Hiche Northwest School of Mission kiloikhom na a hin Northwest lama um State 4 sung houbung ho ahop e. State ho chu ahi le 1. Oregon State, Washington State, Montana State le Idaho State ho ahiuve.

Missionary ho kimutona a chun ei ma mission na toh cheh lamkai ho leh missionary chom chom ho maiya kisei phong (presentation kibol) ahi. Kei ma sanga Pioner Bible Translation loi hon thu asei uve. Ama ho hin jing kah lam pung 9:00 am to 10:00 am chan phat alau ve.

Chujou vin jing kah lam pung 10:00am to 11:00 am chan in ken thusei na phat ka mang e. A kisei phong jou vin, mission team lamkai ho leh loi le gol dang ho chun akisam le avat na mun ho a thudoh leh lamhilna ei peu ve.

Ka che diu dan chu ahi leh houbung ho henga che na ding nikho leh phat chu lamkai hon pha te cha agon toh soh kei u ahi. Houbung khat a mission khat in minute 40 vel phat anei dia ki gong ahi.

Hiche chu mission loi ho chu apung kah sung ki hom toha, ni khata houbung khata mission che ding chu ni leh thum aki hi. Ken houbung khata jing kah lam pung 9:00 am a phat ka man leh mission dang chu pung 10:00 am a hung lhung pai ahi. Houbung mite chun houin a anga jeng u ahi.

Houbung Vil Kipan

1. Fellowship Christian Church, Tacoma (WA)

September 23, 2009 ni jing kah lam pung 9:18 am in Bremerton (WA) a kon in Tacoma (WA) ka hin jon lhon e. Hiche kho te ni ki kah hi agam la behseh poi. Jing kah lam pung 10:00 am kitoh chet in Tacoma (WA) damsel in ka lhung lhon e.

Tacoma (WA) a ka thuseina hi Fellowship Christian Church ahi.  Tacoma kho muna Christian Church hi 1909 kum lang peha ana um ahi tai. Ka che lai tah uva chu 2009 kum sunga kum 100 lhinna Pathen thangvahna leh khopi bol dia ana ki gon lai tah u ahi.

Masanga chu kho sung khata houbung 2 ana um ahi. Hou in te ni hi mile 1 bep ko gamlat ahin, car ngen a lam lha ahi jeh un, nai cha ahi. Houbung mi lhom cheh ahiuvin, nai cha um jong ahi uvin, mun khat a kigop khom ding hi ana tup jing u ahi.

Hiche houbung te ni chu 2005 kum a chu khat a ana gop u ahi.  Houbung 2 a kona Christian ho hung kiloi khom ahiuvin, ching thei taha ki khing to le le ahiuve. Lamkai ya pang hon jong phate cha ching thei tah a lamkai u ahi, thusei hon jong ching thei taha ka sei u ahi.

Mun chom gam chom chom a kona missionary ho thusei ngai din houbung mite ho chu ana kikhom uve. Hiche nia thu sei nga dia hung ki khom chu mi 100 aval uve. A kikhom hi chapang khangdong lang ajao pon, nu pi upa leh kum tam lang thim ngen ahiuve. Houlimna ka nei u chu angai nom lheh un, aki pah thei lheh uve.

September 23, 2009 ni, Fellowship Christian Church, Tacoma (WA) houbunga thukasei chai jou lhon in, sunkim val pung 1:00 pm in Tacoma (WA) da lhan Burien (WA) lam ka jon pai kit lhon e. Hiche Tacoma leh Burien kho te ni hi nai cha ahi. Minute 30 vel bep ka jot lhon e. Sun 1:00 pm a ka kon doh lhon ahin, sun 1:30 pm in ka lhung lhon tai.

 

Ban jop ding….

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>