Myanmar gamsunga Sepai ho vaipoh sung in lekha kisun leh kiso lhom cha bou ana hi. Sepai hon ama ho pomdan toh kitoh lou ho ana so phal pouvin, chule ama ho lung gel doi tup toh kikala thusei leh lekha so aum leh suh gentheina leh songkul a hen na chan a got na ana peh jiu ahi.
Hitia Sepai sorkal in iyakai ana kha jeh chun lekha sun them hon jong ama ho muna bang a sun ta louva, lekha sothei na ahi pou leh tin, Sepai ho deidan dung jui in asun doh jiu vin ahi. Lekha sun ho tampi vang ana lung nom mo lheh uve.
Themzil sang na (Universities) laha themzil ho jong chun asut diu (Research) thulu leh thuho jong gah tah a ana tuh u ahi. Huh khat sung chun University a Master leh PhD research ho chu Buddhism leh Burmese culture thu ngen ana suh sah uve. Hiche jong chu Sepai Sorkal deina lam a asut sah u ahi. Tun Yangon University leh Myanmar gamsunga University a Master leh PhD research kibol ho hi jaotaha thukholna um lou, ama ho dei ngen ahi.
Tu nung hin gamsung lamkai ahung ki khel toh lhon in, Research boldan ahin hop jao sah un, Christian thuhil leh thuhil chom chom lama research bol jong ahin hong pan uve. Chule jong masanga sang in ahop jao sah un ahi.
Hut khat sung chun Christian te thusim leh Bible thu ho cham lhat taha lekha kiso ana um thei poi. Christian hon Christian thusim ho guh thim a ana so ahi louleh “houbung sung a ding bou†tin ana ki so ji e. Tun Christian hi lou Burmese lekha sun them tah tah hon Christian te thusim ho Burmese pao vin ahin so un, pha chom pi sim thei jin aum tai.
American Baptist Missionary Adonirum Judson thusim (2011) jong Mr Tin Naing Toe in gil tah in asun in, sim nop aum lheh e. Hiche lekha bu asutnaa Reference lekha bu 29 amang chan, Burma gama leng te ho record chan akhol doha asut ahin, akim sel e. Sim nop jong aum e.
Chule Houbung thusim (Christian Church History) ho jong ahin sun un ahi. Chubana Bible thusim umdol alhang pin jong ahil chen un, sim nop aum thei lheh e. Myanmar gamsunga ki cheng ahin, Bible thusim jong Myanmar gamsunga kikou dan min ho leh lamkai pan mun ho min ahin man u va kon in, Bible thugil aki het be cheh e.
Tua tobanga thugil ahung ki so tam cheh cheh thei leh Christian te thusim ahin, mipi te hon akhang dungjuiya het dia lom thu ho hung ki he cheh cheh in te ti tahsan aum in ahi. Hichen din mun ahin phat thei hi kipa aum ma ma jeng e.
Leave a Reply